Ач иктә ээҗ ачнртан үлгүр болна

22-02-2024, 13:20 | Общество

Эн өдрмүдт Көтчнр селәнд бәәдг медәт Саңһҗин Паша күүкдтәһән, ачнр-җичнртәһән болн өөрхн элгн-садтаһан 95 җилин ончта өөнән темдглв. Эн сәәхн өөнләнь ээҗиг района һардвр бас йөрәҗ, өрк-бүлиннь байр хувалцв. Әрәсән Президент Владимир Путин Паша Гаряевнад илгәсн йөрәлин бичгиг гиичнр бәрүлҗ өгәд, бат эрүл-менд көгшәд дурдв.

Медәтин җирһлин хаалһ цуг мана аавнр-ээҗнр үзсн җирһллә әдл адрута болн күнд болв, эн баһ цагтан дәәнә болн тууврин күчр зовлңгиг дааҗ һарсмн. Эцкнь Төрскән хортнас сулдххин төлә түрүн зергләнд цергт мордҗ, әмнәсн хаһцв. Экнь гемин уршгар сәәһән хәәһәд күүкән өнчрәв, тегәд Паша аав ээҗ хойриннь хәләврт үлдсмн. Зовлң уга җирһл уга, гиҗ хальмг үлгүрт келгддгәр өнчрәд үлдсн бичкн күүкн удл уга аав-ээҗтәһән цааҗла харһад, төрскн һазрасн туугдхиг медҗәсн уга. Көтчнрә района Хошуд селәнәхн Красноярск крайин Ужурск района Кудырбан гидг колхозд тусв. Күүнә һазрт өлсҗ үкшгон төлә аав-ээҗдән дөң болхар арвн дөрвтә күүкн хар көдлмшт орв.
Паша хөвән олҗ, Улана Бамбала таньлдад, 1951 җилд эдн өрк-бүлән өндәлһв. Цаһан седклтә, сәәхн заңгта, әмтнлә үгтә-күүртә Бамба Дорджиевич ицлтә түшг болад, эдн күүкдән асрад, олна хормад багтҗ ниитә бәәв. Тенд эднә өрк-бүлд Галина, Леонид болн Андрей үрд һарв. Төрскн һазртан хәрҗ ирснә хөөн эдн дәкәд һурвн үртә болв, Сергей, Юрий болн Анатолий көвүднь Көтчнрә района Чкаловский селәнә Дашмн фермд һарсмн. Җил ирвәс төрскн һазрурн хәрҗ ирсн хальмг улсин җирһл ясрад, батрад бәәв, герин эзн фермин лавк толһалв. Хөөннь эн ачта амрлһнд һартлан буудя хадһлдг бүрдәциг һардв. Паша Гаряевна болхла малын хошмудар тосхлһна көдлмш кеҗ, фермин конторин бәәриг ахулҗ үнн-чик седклтәһәр үүлдҗ йовсмн. Бамба Дорджиевич болн Паша Гаряевна отг-әәмгтән күндтә улс болдмн, эдн күүкдтән чик сурһмҗ өгч, бәәрн улст чадсарн дөң-тусан күргҗ, бәәсәрн байн, суусарн өнр бәәдг төләднь ик-бичкн уга эдниг тевчдмн.
(полную версию статьи можно посмотреть в бумажной версии выпуска № 18 (19000) 22 февраля 2024 года, ЧЕТВЕРГ)

ДАВАН Наталья
ЗУРГТ: 95 җилин өөнән темдглсн ээҗ Саңһҗин Паша

Видео