Күндтә гиич таңһчд тогтсн бәәдлиг шинҗлв

27-02-2024, 15:15 | Общество

Шидр мана таңһчд Әрәсән йиртмҗин көрңгин болн экологин министр Александр Козлов (зургт барун таласнь) көдлмшин халхар ирв. Александр Александрович таңһчиг усар тетклһнә, цеврлһнә төрмүд яһҗ хаһлгдҗахинь шинҗлв. Күндтә гиич Хальмг Таңһчин Толһач Хаска Батула хамдан одахн ясгдсн Элстин олн салврта гимназьд одв. Дарунь социальн-экономическ делгрлтин халхар болсн селвлцәнд эдн орлцв.

Элстд сурвлҗ цеврллһнә тосхлт дөчн җил хооран эдлврт орулгдсн билә. Тер цагас авн ясвр кегдәд уга. 2020-2024 җилмүдин Хальмг Таңһчин делгрлтин зурад эн бачм төрмүд орв. Эн сарин эклцәр таңһчин Толһач Хаска Бату Әрәсән Залврин Ахлач Михаил Мишустинд бачм төрмүд хаһллһнд дөң күргхиг сурв. Эн төр Әрәсән тосхлтын, экономическ делгрлтин болн финансин министерствсин хәләврт илгәгдв. Тер мет усар тетклһнә төр бас хаһлгдҗана.
Терүнәс нань модд суулһлһна төр селвлцәнә йовудт бас хаһлгдв. 2024 җилд эн халхд 227 491,6 миңһн арслң йилһгдв, эн мөңгәр шишлң техник хулдҗ авхар зуралҗана. «Экология» келн-улсин төсвин йовудт 1450 гектар аһу һазрт таңһчд модд суулһгдхмн. Өдгә цагт Элст балһсна болн райодын толһачнр бәәрн һазрин кадастрин зура белдҗәнә.
Эн җилин лу сарин 22-т кесн тодигәр эвдрсн 42 шишлң көлгн бәәнә, энүг шинрүлх кергтә. Иим кевәр модд суулһлһна халхд 330,8 сай арслң керглгдҗәнә.

КАРСАНА Евгения
(Йосна гиичллһнә тускар дарук тойгт тодрхаһар барлхвидн)

Видео