Теегин аң-аһрусиг сурһульчнр үзх зөвтә

29-02-2024, 16:05 | Общество

Әрәсән йиртмҗин көрңгин болн экологин министр Александр Козлов йосна гиичллһнә йовудт Элстин олн салврта гимназьд одҗ, сурһульчнрла болн багшнрла күүндв. Күндтә гиичлә хамдан таңһчин Толһач Хаска Бату, таңһчин залврин Ахлач Босхмҗин Гилән, түүнә дарукс Цернә Эрднь болн Дмитрий Трапезников, сурһуль-эрдмин болн номин министр Әңгрә Булһн, Элст балһсна һардврин толһач Шафран Тепшинов болн балһсна сурһуль-эрдмин залврин һардач Эрнҗәнә Арслң иигәрән ирв.

Әрәсән министриг хальмг келн-улсин хувцта сурһульчнр тосад, йөрәл келҗ Александр Козловд болн Хаска Батуд цаһан хадгуд татҗ цаһан хаалһ дурдв. Тиим сән чинртә бат ясврин хөөн шинрсн гимназьд сурхд йир таасмҗта гиҗ күүкд келв.
Дарунь ирсн делегац сурһулин спортын залд одв. Энд ах классин көвүд дамшлтта багш Геннадий Бадма-Гаряевин һардврт баскетбол наачала. Эднд Әрәсән министр кесг меечг бәрүлҗ өгв, баскетбол наадад, чаңһ-чиирг болтн гиҗ дурдв.
Хальмг Таңһчд кесг дәкҗ ирлә, мана һазра тууҗар болн сойлар соньмсна, нег үлү сурһульчнр, баһчуд таңһчд яһҗ бәәдгинь улм тодрхаһар медхәр седнә, – гиҗ сурһульчнриг күндтә гиичлә Хаска Бату таньлдулв.
- Мана гимназин баг ЮФО-н марһанд нүүрлгч орм эзлнә, Цугәрәсән талдан марһаст чигн бас йилһрнәвидн. Мана күцәмҗин тускар сурһулин спортын музейд үзҗ болхмн гиҗ сурһульчнр болн Геннадий Иванович келҗ өгв. Министр музейин һәәхүлиг оньган өгәд хәләв.
Дәкәд гиичнр биологийин кабинетд одв, энд 11-ч классин сурһульчнрла харһв. «Тадн эмнлһнә-биологийин класст сурчанат, эврә таңһчин йиртмҗиг медх зөвтәт. Гөрәсн ямаран бәәдлтәһинь үзлт?» – гиҗ Александр Александрович сурв. Болв зуг цөөкн сурһульчнр энүг үзсн болҗ һарв. «Хар Һазра заповедникд одад, гөрәсн теегт яһҗ бәәдгинь, талдан аң-аһрусиг чигн үзхлә, таднд туста болх гиҗ санҗанав. Тадн өөрхн иргчд таңһчиг һардхит, түүнә йиртмҗиг харсхит, тер кергиг сәәнәр күцәхин төлә эргндк йиртмҗиг, аң-аһрусиг сәәнәр медх кергтә», – гиҗ министр селвгән өгв. Тер мет биологий кичәләр соньмсдг сурһульчнрт Александр Александрович Әрәсән «Улан дегтр» белглв.
Тер мет эклц классин онц гериг, хот уудг хораг чигн Александр Козлов бас хәләв.

Геннадий ТЮРБЕЕВ

Видео