Шишлң көлг белглв

29-02-2024, 16:11 | Общество

Йосна гиичллһнә йовудт Әрәсән йиртмҗин көрңгин болн экологин министр Александр Козлов «Хар һазр» гидг шаңһа заповедникд болн Хальмг Таңһчин йиртмҗин көрңгин болн эргндк бәәдл харлһна министерствин аңһлһиг бүртклһнә әңгд шишлң хойр машинә түлкүр бәрүлҗ өгв. Эн көлгн хаалһ уга һазрт олзлгдна, гиигн болн эдлврт эвтә болна, энүг Грозный балһснд кеҗ һарһна.

- Әмтн, тер тоод бичкдүд, нааран ирҗ, Хальмгин йиртмҗлә таньлдҗ чадҗана. Тадн эн йиртмҗин байн көрңгиг харҗ хадһлхин төлә көдлнәт. Тегәд эн көлгн тана дааврта көдлмшт керглгдҗ туслх. 2015 җилд гөрәснә то 3,5 миңһнд күрдг бәәсн болхла, ода 28 миңһн болна. Эднә то өссн болв чигн энтн ода чигн баһ болҗана. Зака эвдҗ аңһучлдг улс гөрәсн аң Улан дегтрт орулгдсиг учртан авхш. Сурһульчнр теегин аңгудыг эврә нүдәрн үзхин төлә тедниг хадһлх кергтә. Заповедник көдлмшән эн туст шунмһадулҗ, эн нәрн төриг хаһлхд шин көлгн туслх гиҗ ицҗәнәв, - гиҗ Александр Александрович келв.
Әрәсән йиртмҗин көрңгин болн экологин министр Александр Козлов «Хар Һазр» гидг шаңһа заповедникин һардач Увшан Батаарт шин көлгнә түлкүр бәрүлҗ өгч, көдлмштнь күцәмҗ дурдв. Батаар Иванович болхла күндтә гиичд шаазң гөрәс белглв. Хальмг Таңһчин Толһач Хаска Бату Хальмг Таңһчин йиртмҗин көрңгин болн эргндк бәәдл харлһна министерствин әңгин һардач Боован Викторт дәкәд нег көлгнә түлкүр бәрүлҗ өгв.

Наталья ДОДЖАЕВА
ЗУРГТ: Хальмг Таңһчин йиртмҗин көрңгин болн эргндк бәәдл харлһна министерствин көдләчнр шин көлгтә болв

Видео