Итклтә умшачнртан – мана белгүд

29-02-2024, 16:27 | Общество

2023 җилин хойрдгч өрәлд «Хальмг үнн» газетд бичгдсн умшачнр дунд тогтсн авъясар урҗ өдр лотерей болв. Умшачнран байрлулҗ, урмдулхин төлә эн керг-үүлдвр җил болһн давулгдна. «Хальмг үнн» газетин ах редактор Бембин Евгений керг-үүлдвриг секч, мана газет дөңнҗ, бичүлҗ авснд таңһчин олн бүрдәцин көдләчнрт болн нег һазра улст ханлтан өргв. Тер мет олн белгүд хулдҗ авлһнд дөңгән күргсн улст бас ханлтын үгән нерәдв. Таңһчин Улсин Хуралын (Парламентин) депутат Пүрбән Олег, Элст балһсна Хургин депутат Максим Сорокин болн Store 08 лавкин элч Сарңга Нина керг-үүлдврт орлцв. Эднд Евгений Владимирович Ханлтын Бичгүд бәрүлҗ өгв.

2023 җилд барт бичгдлһнә ашар, Лаганя район түрүн зергләнд йовна, тер мет Целинн, Хар Һазра, Яшалтан райодын умшачнр бас нүүрләчнрин тоод орв.
Керг-үүлдврин йовудт 45 белг шүүгдв. Белгүдин тоод олн зүсн эд-тавр орв. Эннь ааһ-сав, электрическ, компьютерн кергсл болн нань чигн тоот мөн. Хальмг Келн-улсин телеүзлин седкүлч Тихона Чингис ирлцңгү керг-үүлдвриг чадмгар һардҗ давулв. Сән һара бешиг Элст балһснд бәәдг багш Нимән Тамара шүүв, «Спецавтохозяйство» ООО болхла телеүзл шүүҗ авв.
Керг-үүлдврин ашар нань белгүдиг Элст балһсна, Лаганя, Целинн, Городовиковск, Ик Буурла, Көтчнрә, Октябрьск, Баһ Дөрвдә, Сарпан, Үстин, Яшалтан райодын элчнр шүүҗ авсмн.
Белгүд шүүҗ авсн умшачнран әрүн седкләсн йөрәҗәнәвидн! «Хальмг үнн» газетин умшачнрт даңгин мана һарц бичүлҗ авчахд ханлтан өргҗ, цааранднь чигн хальмг келәр һардг ор һанцхн газетиг умшҗ йовтн, гиҗ дурдҗанавидн.
Талдан белгүд шүүҗ авсн умшачнрин нер-усинь дора барлҗанавидн.

КАРСАНА Евгения

Видео