Хочи ээҗин зун хавр

14-03-2024, 13:30 | Общество

Күүкд улсин нарт-делкән өдрлә Элст балһснд бәәдг Хочи Бериевна Четырева 100 җилин ончта өөнән темдглв. Олн элгн-саднь, ачнр-зеенрнь, җичнрнь эңкр ээҗән һарсн өдрләнь йөрәҗ, кесг бүлән үг нерәдҗ ачинь хәрүлв. Хальмг Таңһчин Толһач Хаска Бату медәтиг бас йөрәхәр ирв. «Ээҗин һарсн өдр энтн цуг мана Хальмгин төлә ончта йовдл мөн. Иим ут наста улсин то мана таңһчд икдәд йовх зөвтә. Хочи Бериевнад болн энүнд хәәртә цуг улст бат эрүл-менд, хөв-кишг дурдҗанав», – гиҗ Бату Сергеевич йөрәлин үгдән келв.

Ностан Хочи 1924 җилд Үстин улусин Барун сельсоветин Харан Худг хотнд төрҗ һарсмн. Дәәнә өмн күүкн 5 класс төгсәв. Бичкндк цагтан эн багш болхар зуралҗасмн, болв тер санань күцсн уга. Хальмг улсиг цааҗла харһулад Сиврүр нүүлһсн цагт эн эк-эцктәһән, дүүтәһән болн дү күүктәһән Красноярск крайин Партизанск района Малый Имбеж селәнд тусв. Эгчнь тер цагт хәрд һарсн, тегәд эврә өрк-бүлтәһән нүүсмн. Лиҗ ахнь дәәнә һалд хортнла дәәлдҗ йовсмн, тегәд өрк-бүлинь төрскн һазраснь нүүлһсиг медсн уга.
Хөөннь хальмгудыг цергәс буулһад, бас цааҗла харһулв. Харба болн Барун селәдин улс Малый Имбеж селәнд хамдан туссмн, тегәд нег дәкҗ Моңһл болн Бембә Таркаевихн өрк-бүлән олҗ авв. Эднә келсәр, элгн-саднь альд бәәхиг меддг цергчнриг өрк-бүлнь туссн һазрт тәвв. Наадксинь болхла Новосибирскд шахтд күнд көдлмшт йовулв. Новосибирскд эдн Лиҗ гидг баахн көвүнлә таньлдв, эн Барун селәнәс Бериев Носта гидг күүнә көвүмб гиҗ келсн бәәҗ. Ахнь әмд бәәхиг медәд, Хочи эк-эцкдән байрта зәңг медүләд, Новосибирскд бәәдг шахтмудын хайг олҗ авад, кесг бичг тиигәрән бичсмн. Тенд бәәдг нег һазра күүкд күн Саһан Гиләш шахтмудын хайг олҗ авад, күүкнд ахан олҗ авхд дөң-тусан күргсмн. Һундл төрхд, эцкнь ууһн көвүнь өрк-бүлтәһән харһхиг үзсн уга. Ахан олҗ автл Хочи экдән нөкд болад, Цаһан болн Намруш дүүнрән хәләһәд, селәнә эдл-ахуд көдлсмн. Баһ цагасн авн эн боднцг хуралһна, һахас асрлһна, өвс хадлһна, мод көрәдлһнә болн нань чигн хар көдлмш кеҗ, өрк-бүлән теҗәдг бәәсмн.
(полную версию статьи можно посмотреть в бумажной версии выпуска № 25 (19007) 14 марта 2024 года, ЧЕТВЕРГ)

ДООҖАН Наталья
ЗУРГТ: Хальмг Таңһчин Толһач Хаска Бату зун наста ээҗ Четрә Хочиг йөрәв

Видео