Бамб цецгин наадм

14-03-2024, 14:05 | Общество

Хавр ирсн кемлә Хальмг Таңһчд Бамб цецгин наадм давна. Эн җил сәәхн эн нәр-наадн мөрн сарин 1-әс авн бүкл сара хонгтан болхмн.

Этнографическ байрт орлцхар олн зуульчнр Хальмгур ирнә. Кеер теегт урһҗадг бамб цецгүдин сәәхниг үзҗ, теегин цевр аһарт ирсн улс духуцна. Давсн 2023 җилд Бамб цецгин Наадм Әрәсән хамгин соньн этнографическ йовдлмудын тоод орҗ үнлгдв.
Цугәрәсән марһана ашар тиигҗ өөдән үнлгдсн байрт эн җил эртәснь белдвр кегдҗәнә. Сойлын көдләчнр нәр-наад белдҗәнә. Замчнр шимтә хальмг хотар ирсн улсиг сәәнәр тоохар цугинь кеҗәнә. Хальмгин авъясмуд үзүлҗәдг темдгүд болн бичкн белгүд белдҗ, урн һарин эрдмчнр цугинь диглҗәнә.
Мөрн сарин туршарт таңһчин кесг бәәрнд бамб цецгин нәр шуугад-ниргәд бәәхмн. Концертс, олн наадд, марһас, мастер-классмуд, яармс, нань чигн олн керг-үүлдврмүд болхмн. Тер тоод хот-хоолын наадм «МаханФест», джангариад болхмн. Хальмгин дурта бөк бәрлдән, мөрнә урлдан, саадгар халһн, олн наадд, нәрн шинҗ болн шаһа наадлһн, дәкәд нань чигн тоот әмтнд сергмҗ үүдәхмн. Баһчудын оньг эзлх өдгә цага хәләврмүд болн марһас белдгдҗәнә.
Бамб цецгин байрин кемлә келн-улсин театрмудын Цугәрәсән наадм болхмн. Саха-Якуть, Алта, Марий Эл, Чувашия, Башкортостан Республикүдин театрмудын нааддыг Хальмгин хәләһәчнр үзхмн.
Җил болһн олн-әмтиг хурадг сәәхн авъяст тохрсн эн байрин тускар цааранднь чигн умшачнртан зәңгләд бәәхвидн.

ҖИРҺЛИН Кермн

Видео