Орн-нутгин сарул-сәәхн иргчин төлә

16-03-2024, 10:00 | Общество

Өцклдүр мана орн-нутгт Әрәсән Президентин суңһвр эклв. Өрүн 8 часас авн мана таңһчд үүлддг 266 суңһврин әңг цаглань секгдҗ, дууһан өгхәр ирсн улсиг тосв.

Бидн Элст балһсна 4-ч тойгта дунд сурһульд үүлддг 27-ч тойгта суңһврин әңгд өрүһәр ирвидн. Энд дууһан өгхәр ирсн улсиг суңһврин әңгин гешүд тосад, ямр нег сурвр учрхла дөңгән күргв. Энд суңһачнрин оньгт кандидатнрин туск самбр, нуувч таалд дууһан өгхин төлә шишлң бәәрн углҗ тәвгдв. Гемтә-шалтгта улсин төлә бас салу сән таал тогтав. Гер деерән дууһан өгх медәтнрт, эрмдгтә улст шишлң яршгуд белн бәәнә. Суңһврин йовудыг бүрткдг улс цугнь дигтә-даратаһар күцәҗәхинь хәләв.
Сән авъяст тохрсар, ах үйин улс эртәр дууһан өгхәр ирснь үзгдв. Тедн дунд Советск Союзин Баатр Бадмин Эрнцнә күүкн Виктория Эренценовна Костя ачтаһан хамдан (зургт) дууһан өгхәр ирв. Күүкд күүнә келсәр, эдн даңгин өркбүләрн суңһврт орлцҗ, дууһан өгнә. «Орн-нутгин толһачиг суңһҗ авлһн энтн күн болһна төлә дааврта керг мөн. Әрәсән иргч ямаран болхинь, ямр кевәр делгрхинь бидн шиидх зөвтәвидн, тегәд эврәннь кандидатан шүүҗ авад, дууһан өгвидн. Ач көвүм 4-ч тойгта сурһулин 1-ч классин сурһульч болна. Бидн бичкнәснь авн төрскнч сурһмҗ өгч, суңһврин тускар цәәлһҗ өгнәвидн. Мана бичкдүдин байрта-бахта иргчин төлә эндр дууһан өгч, мана Әрәсә батрҗ йовтха гиҗ дурдҗанавидн», – гиҗ Виктория Эренценовна келв.
Суңһврт нерәдҗ, 4-ч тойгта дунд сурһулин эклц классмудын сурһульчнр дунд «Негдсн Әрәсә» гидг зургудын марһан зарлгдв. Суңһврт орлцхар ирсн улс таасгдсн зург йилһҗ авч, бас дууһан өгв. Хөөннь марһана аш диглгдҗ, сән гисн зург зурсн сурһульчнр ачлгдхмн. Дәкәд дунд болн ах классмудын сурһульчнр яарм бүрдәҗ, һуйрин зүүтә хот-хол, олн зүсн кегдлмүд хулдснь иигәрән ирҗәдг улст бас таасгдҗана.

ДООҖАН Наталья

Видео