Әмтнд байр белглдг селәнә артистнр

28-03-2024, 10:20 | Общество

Театрт дурта улсин то йир ик. Театрт цергллһнә эрдмиг шүүҗ авсн улсин то чигн баһ биш. Әмтнд байр белглдг эн эрдмин үүлдәчнр моһа сарин 27-д байрин өдрән темдглнә. Хальмгт һурвн театр үүлднә. Басңга Баатрин нертә Келн-улсин драматическ театр, драмин болн шог наадна Орс театр болн «Җаңһр» нертә наадһасин Хальмг шаңһа театр мөн. Тедн наадд үзүллһнә эврә сән янзта, олн дунд тааслт олсн коллективс болна. Театр болһн эврә хәләһәчнртә болсн деерән үүдәлтин бат хаалһд йовна. Үүдәгч эн коллективсиг байрин өдрләнь йөрәҗ, билг-эрдмин халхар улм өөдән күцәмҗ дурдҗанавидн.

Таңһчд эврә сән дурарн үүлддг театрмуд бас бәәнә. Урднь болхла театрт дурта улсиг хамцулдг кесг тиим театр таңһчин райодар үүлддг билә. Ода болхла, Яшалтан болн Лаганя района Җалган улсин театрмуд үүлдҗәнә. Эндр бидн эврә дурарн үүлддг артистнрин тускар келхәр бәәнәвидн.

Җалга селәнә сойлын герт улсин театр 1974 җилд эклҗ үүлдсмн. Селәнә сойлын герт түрүләд драматическ кружок бәәсмн. Терүг Әәдрхнә - сойлын-гегән - герлин училищ төгсәсн В. М. Шаркаева һардсмн. Селәнә улс: В. Наранов, С. Говоров, Л. Хабкукова, Л. Сангаджиева түрүн артистнрнь бәәсмн. Җилмүд давад, билгтә болн театрт цань уга дурта улсиг хамцулсн театр селәнә сойлын җирһлин йоста төв болсмн. Үүдсн түрүн җиләс авн хальмг келәр кесг наадд белдв. Тернь – Басңга Баатрин «Күмн өврҗ ханшго йовдл», Нармин Морхаҗин, Балакан Алексейин, Нуура Владимирин, Саңһҗин Босян, Увшан Ивана наадд мөн. «А зори здесь тихие», «Иван и Мадонна», «Выходили бабки замуж» болн нань чигн наадд энд тәвгдсн мөн.

(полную версию статьи можно посмотреть в бумажной версии выпуска № 31 (19013) 28 марта 2024 года, четверг)

ҖИРҺЛИН Кермн
Зургт: селәнә театрин тәәз деер

Видео