Баһчудыг буру йовдлас гетлхәр

28-03-2024, 10:40 | Общество

– Моһа сарин 22-т Москвад Крокус Сити Холлд зеткртә йовдл учрад, олн күн әмнәсн хаһцв. Терүнә хөөн Әрәсән иргнмүдин ниигмин сүлҗәнд әәмшгтә зәңг ирдг болв. Нурһлҗдан баһчудт болн арвтнрт Крокус Сити Холлд болсн йовдлын әдләр орн-нутгин талдан ик бәәшңгүдт мөңгнә төлә тиим әәмшг учрахд даалһвр өггдҗәхинь нег һазра улс үзҗ соңсв. Эн долан хонгт сурһульчнр хаврин амрлһнд һарсн бәәнә. Бидн авальтаһан өдртән көдлмштән бәәнәвидн, үрмдн гертән өдртән хәләвр уга бәәснь намаг үүмүлҗәнә. Амрлһна өдрмүдт арвтнриг тогтсн бәәдләс болн зеткрәс гетлхин туст ямаран керг-үүлдврмүд давулгдҗахинь медхәр седләв, – гиҗ Элстд бәәдг олн үртә эк Цеднә Амулң соньмсчана.

Сурврт Хальмг Таңһчин МВД-н барин цергллтин һардач, полицин майор Марина Сасыкова хәрү өгчәнә:

– Өдгә цагт ниигмин сүлҗәнд зөв-йос эвдҗәдг болн мек-тах һарһдг улс олн зүсн зура тогтаҗ, олнд тархадг болв. Терүнднь әмтн, нег үлү медәтнр, баһчуд иткәд, буру йовдл һарһснь дару-дарунь соңсгдна. Эндр баһчудт дала мөңг өгәд, әәмшгтә йовдлмудт орлцулхин туст олн зүсн зәңг теднә ниигмин сүлҗәнд ирнә.

Хамгин түрүнд эк-эцкнр үрдән Интернет олзллһнас цаг-зуур баһрулх зөвтә. Өдр болһн көдлмшәсн ирчкәд, үрдтәһән күүндх кергтә. Кенлә үүрлҗәхинь, телефоһар даңгин кенлә күүндҗәхинь медх зөвтә. Орн-нутгт тогтсн зовлңта бәәдлин тускар кесг дәкҗ давтад эднд тодлулад бәәхмн. Таньдго күүнлә күүндхәсн саглх кергтә. Тер мет үрнәннь өөрхн үүрмүдлә, нег үлү теднә эк-эцкнрлә, багшнрла даңгин залһлда бәрхлә бас буру йовдлас гетлҗ болна. Талдан сурврмудт хәрү авхин төлә болн үүмүлҗәдг нань чигн төрмүдәр 102 тойгар җиңнүлҗ медҗ болна.

Евгения КАРСАНОВА

Видео