Хот-хол үнтәрәд бәәнә

30-03-2024, 09:02 | Общество

Эн җилин эклцәс авн көдлҗәдг улсин җалвин баһ гисн кемҗән өөдләд, арвн йисн миңһн һар арслң болв. Җалв өөдлсн болв чигн хамг тоот өдр ирвәс үнтәрҗәхәс иштә кесг әмтнд олсн мөңгнь әрә күртнә. Хот-хоолан авад, коммунальн туслмҗин мөңгән өгснә хөөн хувц-хунран шинрүлх, нань чигн керг күцәх кергтә болна. Өрк-бүлин мөңгнә ик зунь хот-хоолд һардг болна. Нег үлү ода махн, үсн болн өндг зөвәр үнтәрв.

Олн үртә эк Мацга Саглр амрлһна өдрмүдт лавкд болн базрт одад, ирх долан хонгт кергтә хот-хол, зер-земш болн темс хулдҗ авна. Эднә өрк-бүл һурвн көвүтә, цуһар эдн спортар соньмсна, тегәд үрднь чаңһ-чиирг болн эрүл-менд өсхин төлә шимтә, сенр хот кергтә гиҗ экнь тоолна. Баахн бер долан хонг болһн үкрә, такан, һахан махар олн зүсн хот-хол белднә. Энүнә келсәр, сүл цагт махн зөвәр үнтә болв, тегәд терүг хулдҗ авхин төлә дала мөңгн һарна. Тиигәд, үкрә махн 500-650 арслң, һахан махн болхла 380 арслң күрнә. Ода төл авлһна кем болҗахас иштә хөөнә махн дегд үнтәрв, терүг базрт хулдҗахш. Такан махн нидн үнтәрәд, ода чигн кимдрәд уга.

- Хальмг күн махн угаһар бәәҗ чадхш, тегәд би өдр болһн махта хот белднәв. Өрүнднь хаш чаннав, тегәд үсн болн тосн дарунь чилнә. Үсн ода лавкд 75 арслңгас авн 90 арслң күртл үнтәрв, 200 грамм тосн 130 арслң күрнә. Өдр болһн өдмгән авх кергтә, шикр-балта угаһар манахс бәәҗ чадхш. Бидн авальтаһан хамдан көдлнәвидн, тегәд нег җалв бүклдән хотд һарна. Көвүд дарунь өсәд, хувцнь бичкдәд одна. Үрдтән шаңһа демин мөңг авнавидн, тегәд тернь эднд хувц-хунр хулдҗ авхд, секцд одхд, немр сурһуль сурхд һарна, – гиҗ күүкд күн келнә.

(полную версию статьи можно посмотреть в бумажной версии выпуска № 32 (19014) 30 марта 2024 года, суббота)

ДООҖАН Наталья

Видео