Үүлдврнь күцәмҗтә болтха!

02-04-2024, 10:02 | Общество

Давсн долан хонгин чилгчәр Элстд Хальмг Таңһчин Улсин Хуралын (Парламентин) медлд үүлддг баһчудын Олна палатын түрүн сүүр болв. Терүнд ЮФО-д Әрәсән Президентин күцц зөвтә элчин аппаратын Хальмг Таңһчд үүлддг ах федеральн инспектор Александр Беляев, таңһчин Улсин Хуралд Хальмг Таңһчин Толһачин элч Манҗин Араш, таңһчин залврин Ахлачин негдгч дарук Цернә Эрднь, таңһчин Олна палатын ахлач Мучан Батыр орлцв. Сүүриг таңһчин Улсин Хуралын Ахлач Артем Михайлов нүр үгәр секәд, баһчудын палатын гешүд зака үүдәгч үүлдврт орлцҗ, таңһчиннь төлә күцәмҗтәһәр үүлдхиг дурдв.

Эн сүүрт бүрдәмҗин төрмүд хәләгдв. Тиигәд, таңһчин баһчудын палатын ахлач, терүнә дарукс, экономическ политикин, баһчудын парламентаризм делгрүллһнә болн социальн политикин комитетмүдин ахлачнр болн гешүд, чик авг-бәрцин комиссин хань батлгдв. Тиигәд, палатын гешүд нег дууһар Дорҗин Санлыг ахлачд, Аган Виталийиг болн Донкан Ангираг энүнә дарукст суңһҗ авв. Экономическ политикин комитетин ахлачд Манҗин Амгалан, закана болн баһчудын парламентаризм делгрүллһнә комитетиг Нарни Идатиев, социальн политикин комитетиг Анастасия Смирнова һардв.

«Негдсн Әрәсә» партин «Политстарт» гидг төсвин тускар Федерацин Хүүвин элч Байр Путеевин нөкд Очаныка Евгения болн партиг дөңнлһнә штабин һардач Бадан Бадм келҗ өгв. Баһ наста политикүдиг белдлһнә, дамшлт хоршалһнд туслдг төсв седвәртә баһчудт туста болхиг эдн зааһад, штабин улд федеральн болн региональн шинҗләчнрлә, нертә улсла болдг харһлтст орлцх үрвр кев. Сүүрт орлцсн Олна палатын ахлач Мучан Батыр, таңһчин баһчудын керг-төрин агентствин һардач Камиль Маркеев баһчудын палатын гешүдт цуг халхин дөң күргҗ, хамцу үүлдхин төлә хамцу керг-үүлдврмүд давулх санаһан медүлв.

ЮФО-д Әрәсән Президентин күцц зөвтә элчин аппаратын Хальмг Таңһчд үүлддг ах федеральн инспектор Александр Беляев баһчудын палатын гешүдиг бас йөрәв. «Арвн - арвн тавн җил давад, тадн таңһчин зака үүдәгч болн күцәгч йосна халхд көдлҗ, таңһчан һардх улс болҗанат. Тегәд ода олна бәәдл-җирһлд шунмһаһар орлцҗ, ардасн талдан баһчудыг дахулҗ, төрскн һазр-уснаннь делгрлтин төлә үүлдтн. Тадн әмтнә җирһл ясрулх улс болҗанат, тегәд ода байн дамшлт хоршаҗ автн. Олна палатын үүлдвр күцәмҗтә болтха», –гиҗ Александр Викторович дурдв.

ДООҖАН Наталья
ЗУРГТ: Хальмг Таңһчин Улсин Хуралын (Парламентин) медлд үүлддг баһчудын олна палатын гешүд

Видео