Сурһульмудын ясвриг бүрткв

02-04-2024, 10:07 | Общество

Шидр Хальмг Таңһчин Улсин Хуралын (Парламентин) Ахлач, парламентд «Негдсн Әрәсә» партин әңгин һардач Артем Михайлов депутатнр Олег Пюрбеевла болн Зулта Цекировала хамдан Элст балһсна дунд сурһульмудт күцәгдҗәдг бат ясврин йовудыг бүрткҗ хәләв.

Эн җил хотл балһснд 2-ч, 20-ч болн 23-ч тойгудта дунд сурһульмуд бат кевәр ясгдҗана. Балһсна 23-ч тойгта сурһульд ясврин көдлмшин түрүн девсң төгсв. Тосхачнрин келсәр, ода деерән ясврин көдлмшин 20 процентнь кегдсн бәәнә. Ода бәәрин ораһинь сольҗана, электрокүчәр, усар тетклһнә сүлҗән углҗ тәвгдҗәнә, нань чигн талдан көдлмш кегдҗәнә.

2-ч тойгта дунд сурһулин бәәрн 1941 җилд тосхгдсмн, тенд цергә госпиталь бәәршлҗәсмн. Терүнәс иштә энд урдаснь зуралгдҗасн көдлмшәс нань кесг төр хаһлх кергтә болв. Тосхачнрин темдглсәр, бат ясврин көдлмш икдхнь маһд уга. 20-ч тойгта дунд сурһульд шин терзмүд углҗ тәвлһнә көдлмш төгсчәнә, электрокүчнә сүлҗән шинрүлгдҗәнә, хораст эрсмүд шинәс шалдҗана. Энд тосхлтын көдлмш 35 процентд кегдв.

- Мана хотл балһсна сурһульмудт кегдҗәдг бат ясврин йовудыг депутатнрла хамдан хәләһәд, цугнь батлгдсн диг-дараһар күцәгдҗәхиг үзвидн. Цуг бәәрнд тосхлтын материалмуд күцц, көдләчнр седклән тәвҗ көдлҗәнә. Зәрм бәәрн зөвәр хуучн болн өвәрцтә болҗахас иштә ясврин көдлмш күцәхд амр болҗахш. Болв тер бийнь ясврин көдлмш батлгдсн кемд төгсәд, сурһулин кем цаглань эклх зөвтә. Сурһульчнр болн багшнр намртан шинрүлгдсн сурһульд ирхмн. Ясврин йовудт зәрм хорас икдүлгдхмн, үлгүрнь, хот уудг болн сурһулин немр хорас шинәс тосхгдх. Балсһна һардвр ясврин көдлмшт шунмһаһар орлцҗ, сурһулин бүрдәцсин эргндк һазрт сән кец-таал тогтах зөвтә, – гиҗ Артем Михайлов келв.
«Шин сурһуль» гидг төсвин йовудт эн җил мана таңһчд 6 сурһульд бат ясврин көдлмш күцәгдҗәнә.

БАТАН Наталья
ЗУРГТ: депутатнр ясврин көдлмш бүрткҗәнә

Видео