Һәрән Лиҗин концерт

04-04-2024, 09:14 | Общество

Хальмг Таңһин ачта артист Һәрән Лиҗин буйнч седклин концерт шидр Элст болв. Билгтә дуучин билг-эрдмд дурта әмтнд эн концерт ик байр үүдәв. Концертин йовудт таңһчин сойлын болн зуульчллһна министр Түрвән Саглр дуучд ачлвр бәрүлҗ өгв. Таңһчин Толһач Хаска Батун зәрлгәр Һәрән Лиҗ Хальмг Таңһчин Күндллһнә Һашгар ачлгдсмн.

А. Цебековин нертә шаңһа хорин ханьд билгтә дууч көдлнә. Таңһчдан нертә дуучин билг-эрдм орн-нутгт чигн темдгтә болв. Кесг марһанд, тер тоод «Звезда» гидг Цугәрәсән марһанд орлцад, Лиҗин дун орн-нутгин олн хәләһәчнрт тааста болв.

Таңһчд болдг байрин концертст Һәрән Лиҗ даңгин орлцна. Буйнч седклин керг-үүлдврмүд чигн энүг угаһар давхш. Билг-эрдмин олн хәләврт орлцад, Лиҗ олн үүрмүдтә болв. Хальмг дуунд теднә седклинь тусхаһад Лиҗ кесгинь Хальмгт авч ирәд, хамцу концертс әмтн сән тодлна. Ах үйин улсиг күндлҗ өссн билгт үр Феликс Шорваевла хамдан Хальмг телеүзләр «Дуука болн Куука» гидг соньн соңсхвр белдҗ үзүлдгнь олн соңсачнр дунд ик тааслт олв. Төрскн келән делгрүллһнд эн хойр билгт тиигҗ шунҗ орлцҗ йовна.

Концертдән билгтә дууч хальмг ду дуулсн деерән, моңһл, бурят, туван дуд дуулна. Хальмг улсин ду дуулсн цагтнь әмтн йир таасч соңсна. Хальмгудын седкл, җирһл болн байр орсмн гиҗ әмтн Лиҗин өргҗ дуулсн дуунднь бахтна.

Орн-нутгт амр биш цагт күн болһн эврә үүлдврәрн ни-негн болн эвин бәәдл тогталһнд орлцх зөвтәг дууч седкләрн меднә. Буйнч седклин концертд цуглрсн мөңгн СВО-д орлцҗадг цергчнрт дөң гиҗ илгәгдв.

ЖИРҺЛИН Кермн

Видео