Лаганьд гиичлҗ ирхмн

04-04-2024, 09:36 | Общество

Москван ВДНХД-д Хальмгин һәәхүлд олн керг-үүлдвр күцәгдҗәнә. «Әрәсә» гидг һәәхүлд шидр соньн нег марһан болв.

Тер марһанад диилвр бәрсн күн Лаганьд болдг бадм цецгин байрт орлцхмн. Хальмг Таңһчин туск сурврмудт хәрү өгхәр олн күн цуглрв. Әмтн Хальмг Таңһчин тууҗин, сойлын тускар, Көк теңгсин көвәд бәәдг Лагань балһснд һәәхҗ болх олн тоот тускар медснь эднд йир соньн болв.

Ачнр-зеенртәһән нааран ирсн Галина Цветкова марһана дииләч болв. Энүнә ачнр-зеенр ээҗтәһән хамдан сурврмудын ик зууднь чик хәрү өгв. Хальмгт ирх мөрә авсндан Галина ик байрта бәәнә. Ландшафтн дизайнер болҗ көдлдг күүкд күн йиртмҗин бәәдләр даңгин соньмсна. Шин һазр үзнә гисн Галина Цветковад ик хөвтә йовдл болҗана.

УШКАНА Сувсн

Видео