Хальмг күүкн цергчнрт дөңгән күргҗәнә

06-04-2024, 09:02 | Общество

Шишлң цергә керг-үүлдвр эклснәс авн мана нег һазра улс терүнд орлцҗ, залу-зөрмгән үзүлҗ, үнн кевәр церглҗ йовна. Залу улсла зерглҗ хальмг күүкд улс бас цергә даалһвр күцәҗ йовхнь темдгтә. Теднә негнь Кичгә Байрта болна. Тер һазрт госпитальд көдлҗ, шав авсн цергчнрт түрүн дөң күргҗәнә. Шидр Байрта Т.Хахлынован нертә медицинск колледжин оютнрла харһҗ, энд сурһуль сурч йовсн цаган тодлҗ, цергә керг-үүлдврт күцәҗәдг көдлмшин тускар келҗ өгв. Харһлтд Хальмг Таңһчин Олна палатын ахлач, «Төрскән харсачнр» гидг шаңһа саңгин һардачин дарук Мучан Батыр, таңһчин эрүл-менд харлһна министерствин олна хүүвин ахлач Болтыра Александр орлцв. Колледжин һардач Манҗин Кермн харһлтыг нүр үгәр секәд, Кичгә Байрта энд сурчадг баһчудла харһхар ирснь ончта йовдл болҗана гив.

Кичгә Байртан эк-эцкнь болн ахнь Ик Буурла районд бәәнә. Эн бичкнәсн авн юрист болх саната билә, экиннь селвгәр эн медицинск колледжд орсмн. Энд 2002-2005 җилмүдт сурч йовла. Оютн бәәсн цагтан эн нилхд төрлһнә төвд санитаркар көдлҗ, олсн мөңгәрн бийән даасн деерән дамшлт хоршаҗ авсмн. Сурһулин хөөн эн күүкд улсин консультацд, П.Жемчуевин нертә таңһчин эмнлһнд көдлв. Сүл җилмүдт болхла Москва балһснд нүүрлгч эмнлһст көдлҗ йовсмн, тер тоод Коммунарка төвд пандемийин цагт госпитальд көдлсән келв.

(полную версию статьи можно посмотреть в бумажной версии выпуска № 35 (19017) 6 апреля 2024 года, суббота)

ДООҖАН Наталья
ЗУРГТ: харһлтын кем

Видео