Минск заводын әңгиг өргҗүлхәр

06-04-2024, 09:05 | Общество

Хальмг Таңһчин залврин Ахлачин дарук Дмитрий Трапезников Элстд Минск тракторин заводын әңг тосхлһна төрәр селвлцә давулв.

2023 җилд таңһчин Толһач Хаска Бату болн «МТЗ» ОАО-н һардач Виталий Вовк нөкцлтин халхар хамцу төсв күцәхин төлә бооца батлсн билә. Тер җилин чилгчәр Элстд эн заводын әңг секгдв. Зуг бәәрнь бичкн, тегәд ик талвңта у-өргн бәәр тосххар шиидгдсн билә. Өдгә цагт ирлцңгү һазр йилһҗ һарһгдв, тегәд, хөн сард чинртә тосхлт эклхмн. Тенд 100 трактор багтамҗта талвң, техникиг тетклһнә станц, ясвр күцәлһнә бәәрн болн талдан тоот тосхгдх зөвтә.

Элстд дилерск әңг тосхгдхла, зер-земшин, темснә, тутрһин, боднцгин урһц хураҗ болхмн. Тер мет мал өсклһнд бас туслхмн. Терүнәс нань таңһчд көдлмшч немр ормс бүрдәгдҗ, алвна орун кемҗән өсхнь маһд уга.

Хальмг Таңһчин Толһач Хаска Батун даалһврар, селәнә эдл-ахун министерств нег һазра арһлачнр шишлң техник хулдҗ авлһиг урмдулхмн. Эндр Росагролизинг, Сберлизинг, Газпромлизинг эн көтлврәр көдлҗәнә. Тер мет Әрәсән селәнә эдл-ахун министерствин халхар онц зөвтә кредитын мөңгиг зуг Россельхозбанк болн Сбербанк һарһҗ өгч чадна.

ОЛЬДАН Цаһан

Видео