Хаврин байр эклв

09-04-2024, 09:00 | Общество

Шидр мана таңһчд хаврин хамгин сәәхн байр, Бамб цецгин наадм, эклв. Хальмг Таңһчин Толһач Хаска Батун зәрлгәс иштә эн керг-үүлдвр 2022-ч җиләс авн сара хонгт болна. Эн җилин нәр-наадн хальмг улсин туульст болн алдр орс шүлгч Александр Пушкинә 225 җилин өөнд нерәдгдҗәнә.

Бемб өдрлә Элст балһсна Диилврин талвңд олн-әмтн хурв. Нарн мандлад дулан, сәәхн өдр болв. Байрин концертд үзүлгдсн наадна йовудт үвлин цасн хаврин дуланла зүтклдҗәхиг үзүлв. 1829 җилд Ар Кавказар зуульчлҗ йовсн Александр Пушкин хальмг теегт бас ирсн билә. Күндтә гиичиг әмтәхн, шимтә хотар тооһад, хар керән туск хальмг тууль энүнд келҗ өгв. Керәс цуглрҗ мандлҗадг шар нариг җиврәрн хаав. Хавр шулун иртхә гиһәд, хальмгуд шишлң авъяс давулҗ, Мазн Баатриг әрүн шовуна өд олҗ авхин төлә хол хаалһд йовулна. Эн мөр унад, ус болн элс темцәд, даалһвран күцәһәд, әрүн шовуна өд олад авч ирнә. Терүнә хөөн дарунь нарн һарад, тег йосндан серв. Тег делгүдән көкрәд, гөрәсд, хөөнә хурһд гүүҗ, бамб цецгүд экләд цецгәрв. Ке-сәәхн эн нәр-наадыг Хальмгин нертә бичкдүдин сойлын коллективс, нертә артистнр болн дуучнр белдҗ үзүлв.

Бамб цецгин наадм секлһнә өдрт Элстд кесг талвңгуд экләд көдлв. Балһсна төвд, Көглтин Даван бумблвин өөр, шүлгләни марһан болв. Баатрмудын Аллейд болхла, нег һазра арһлачнр кеҗ һарһсн эд-тавран, олн зүсн белгүдән хулдв.

(полную версию статьи можно посмотреть в бумажной версии выпуска № 36 (19017) 9 апреля 2024 года, вторник)

КАРСАНА Евгения

Видео