Ханлтын бичг бәрүлҗ өгв

09-04-2024, 09:03 | Общество

Шишлң цергә керг-үүлдврт орлцҗадг Кичгә Байрта (энүнә тускар урднь бичләвидн) зөрмгән үзүлҗ даалһвран үнн кевәр күцәсн төләднь Хальмг Таңһчин Хуралын (Парламентин) Ахлач Артем Михайлов Ханлтын бичг бәрүлҗ өгв. Таңһчин Улсин Хуралын (Парламентин) депутат, «Төрскән харсачнр» гидг шаңһа саңгин региональн әңгин һардач Хаалһин Очр харһлтд орлцв.

Кичгә Байрта шишлң цергә керг-үүлдврт җил шаху орлцҗана. Эн көдлҗәдг госпиталь бәрлдән болҗадг һазрас хол биш бәәнә, тегәд шав авсн цергчнрт эдн түрүн дөң күргнә. Цергчнрин әм аврсн төләдән эн медаляр ачлгдсмн, ода эн амрлһнд бәәнә.

- Нег һазра күүкд күн шишлң цергә керг-үүлдврт орлцҗ, шав авсн цергчнрт түрүн дөң күргҗ, эднә әминь аврхин төлә зөрмгән үзүлҗ көдлҗәхиг соңсад, эрк биш харһҗ күүндх кергтә гиҗ шиидләв. Эврәннь болн мана депутатнрин нерн деерәс ик ханлтан өргҗ, үнн кевәр цергә даалһвран күцәҗәхинь темдглвидн. Шишлң цергә керг-үүлдврт орлцачнрин социальн теткврин болн эднә зөв харсхин төлә бидн таңһчин закадт сольвр орулҗ, онц зөв батлвидн. Энтн мана партин улсин көтлврин һол күсл болҗана. Бидн арһ-чидлән хамцулҗ, мана цергчнриг дөңнлһнә чинртә керг күцәҗәнәвидн, - гиҗ Артем Васильевич темдглв.

Артем Михайлов «Негдсн Әрәсә» партин СВО-н төрмүдәр таңһчд үүлддг көдлмшч багиг һардна. Эн баг «Төрскән харсачнр» гидг шаңһа саңгин региональн әңгин көдләчнрлә хамдан цергчнрин болн эднә өрк-бүлмүдин социальн, эмнлһнә халхар болн нань чигн төрмүд хаһлна. Тер мет эдн СВО-д орлцачнрин онц зөв батллһна туст седвәр татҗ, цергчнрин зөв харслһна төрмүдт ик оньг тусхана.
Харһлтын йовудт Кичгә Байрта бийиннь тускар келҗ, цаһан седкләсн цергчнрт дөңгән күргҗәхән медүлв.

БАТАН Наталья
ЗУРГТ: таңһчин Улсин Хуралд болсн харһлт

Видео