Болһсн хотнь шимтә болна

09-04-2024, 09:08 | Общество

Эрдм болһн эврәһәрн чинртә, олнд туста болн кергтә гиҗ нертә шүлгч келсн болдг. Замч седклән өгәд, шимтә болн сенр хот болһхла, терүг идсн улс цадад, ханлтын үг келдг. Баһ Дөрвдә районд үүлддг мәдәтнрин гер-интернатд замчар көдлдг Манҗин Кермн бичкнәсн авн хот болһхдан таасна, нег үлү һуйрин зүүтә кегдлмүд кеҗ-һархдан эн дурта. Социальн бүрдәцд бәәдг гемтә-шалтгта улс болн медәтнр энүнә болһсн хотыг шавхр үлдәлго сәәнәр зооглна. «Мана идсн хотн аршан болтха, ут наста болтн», гиҗ эдн йөрәл тәвҗ, замчнрт ханлтан өргнә.

Манҗин Кермн энд тавн җилдән замчар көдлҗәнә. Энүнлә хамдан нег селгәнд Бадмин Юлия көдлҗәнә, эдн эрүл-менд харлһна көдләч диглҗ тогтасн диг-дараһар хот-хол белднә. Эднә көдлмшч өдр эрт эклнә, хамгин түрүнд эдн хаш, цә болһҗ, өрүн идх хот болһна, һуйр элднә. Келхд, эдн бийснь өдмг болһна. Дарунь эдн үдин хот белдҗ, мах болн темс эд-бод кенә. Үдин хөөн 15 часла медәтнрт һуйрин зүүтә кегдлмүд цәәтәһәр өгнә, тегәд терүг эртәснь бас белдҗ, дигтә цаглань терүг өгх кергтә. Хөөннь асхн идх хотан белдҗ, ааһ-саван хураҗ, нань чигн көдлмшән кецхәнә.

- Мана интернатд бәәдг көгшд җөөлн хотд дурта, дәкәд эднд олн зүсн темс, зер-земш, мах өдр болһн өгх кергтә. Мана медицинск көдләч күн болһна эрүл-мендин бәәдл учртан авч ямаран хот-хол белдхиг диглнә. Бидн өдр болһн 13 өдмг болһнавидн. Ээзгә болн нань чигн темс немәд бешд сенр хот-хол болһнавидн, медәтнр терүнд йир дурта болна. Келн-улсин байрла, медәтнрин һарсн өдрлә сенр, шимтә, эднә сурврар тааста хотынь белднәвидн. Сән авъяст тохрсар Цаһан Сарин, Зулын байр болхла боорцг кенәвидн, орсин сән өдрмүдт өндг ширдәд, һуйрин зүүтә кегдлмүд бас кенәвидн. Мана бүрдәцд өдгә цага беш, мах болн темс эд-бод кедг кергсл бәәнә, тегәд олн зүсн хот белдхд амр болна, – гиҗ Кермн Петровна келнә.

(полную версию статьи можно посмотреть в бумажной версии выпуска № 36 (19017) 9 апреля 2024 года, вторник)

ДООҖАН Наталья
ЗУРГТ: замч Манҗин Кермн

Видео