Ирлцңгү цаасн уга болв

11-04-2024, 14:26 | Общество

Аһш балһсна һурвн лавкд зөв угаһар талын орна эд-тавр хулдгдҗаснь илдкгдв. Энүнә тускар Әәдрхнә болн Аһшин мүҗәр, Хальмг Таңһчар үүлддг Әәдрхнә таможнь зәңглв.

Мобильн телефод, чикндән зүүдг кергсл, адаптермуд, USB болн талдан ирлцңгү тоот арһлачнр хулдад бәәсмн. Эн эд-тавриг Китдын, Энткгин, Вьетнамин, Малайзиян болн Филиппины орн-нутгт кеҗ һарһсн бәәҗ. Арһлачнрин келсәр, энүг Москван лавкст хулдж авсмн. Ут тоодан зурһан миңһн тоот илдкгдв.
Бүртклһнә керг-үүлдврин йовудт цуг эд-таврин үн тавн сай арслң тогтаҗахнь медгдв. Зөвтә зөв угаһар эд-тавр хулдгдҗ авгдсиг иткүлҗәдг ирлцңгү цаасн уга бәәснь бас илдкгдв.
– Тиим эд-тавр мана орн-нутгт хулдгдх зөв уга. Зөв-йос эвдсн күн ялд уңһагдхмн. Ирлцңгү цаасн уга эд-таврин чинрнь чигн сән биш болҗахнь илдкгдв, цуг хамг тоот эд-таврин эргцсәс авгдв, арһлачнрин туст цааҗин кергүд бүтәгдв, – гиҗ Әәдрхнә таможня һардачин дарук Александр Гурин зәңглв.

Мана зәңгч

Видео