«Әрәсән нерд» марһанд ончрв

11-04-2024, 14:30 | Общество

Мана таңһчин уйн наста билгтнр Әрәсән болн нарт-делкән марһаст ончрҗ, хальмг улсин сойл ик холд туурулҗ йовхнь ик бахмҗ үүдәнә. Бичкн биичнр, дуучнр, зурачнр билг-эрдмәрн олн-әмтнә седкл авлҗ, төрскн һазр-уснаннь нериг өөдән бәрҗ йовхнь мана сойл делгрәд йовхиг герчлҗәнә. Одахн Элст балһсна бичкдүдин билг-эрдмин 2-ч тойгта сурһулин «Теңгрин би» ансамбль «Әрәсән нерд» гидг бичкдүдин үүдәлтин нарт-делкән X марһанд орлцад, дөрвн алтн болн хойр күрл мөңгн медаляр ачлгдв. Күүкд-көвүд билг-эрдмәрн жюрин гешүдиг авлад, намрар Москва балһснд Кремлевск бәәшңд болх марһана ашлгч ик концертд орлцх зөв авв.

Ансамблин һардач Данара Бакиеван келсәр, марһанд ут тоодан 32 күүкн-көвүн орлцв. Цуһар эдн Элст балһсна бичкдүдин билг-эрдмин 2-ч тойгта сурһулин хореографическ әңгд сурна. Марһанд орлцсн бичкдүд нурһлҗ 2-ч болн 4-ч классин сурһульчнр болна, эдн урднь чигн олн зүсн хәләврт орлцҗ, диилвр бәрсмн. Сүл дөрвн җилин эргцд эдн Әрәсән болн нарт-делкән марһасин лауреатнрин нер зүүҗ, хальмг улсин сойлыг делгрүллһнд эврә тәвцән орулҗадг бичкдүд мөн.

- «Чичрдг», «Шарка-барка», «Бадм цецг» болн «Махлата би» гидг би бииләд, мана бичкдүд I девсңгин лауреатнр болв, «Ар үзгин» болн «Тоһстн» гидг би бииләд, III девсңгин дипломар ачлгдв. Эн марһан Әрәсән Президентин мөрәһәр бүрдәгднә. Мана биичнр марһана бүрдәһәчнрт йир таасгдв, тегәд гранд-финалд орлцҗ негдсн ик концертд орлцх зөв маднд өггдв. Зун һар күүкн-көвүн эврәннь келн-улсин би биилснә дару хамцу би биилхмн. Эн концерт Кремлевск бәәшңд болх, мана бичкдүд терүнд орлцхнь ончта йовдл болҗана. Москва, Санкт-Петербург, Новосибирск, Краснодар, Хазан, Красноярск, Уфа балһсдын үүдәгч коллективс эн марһанд орлцв, мана уйн наста биичнр эдн дунд күцәмҗтәһәр орлцҗ, диилвр бәрснь бахмҗ үүдәв, – гиҗ Данара Николаевна келнә.

(полную версию статьи можно посмотреть в бумажной версии выпуска № 37 (19018) 11 апреля 2024 года, четверг)

ДООҖАН Наталья
ЗУРГТ: «Теңгрин би» ансамбль нарт-делкән марһанд орлцсн кем

Видео