Хоньна Михаилын нерн хол Якутьд чигн мартгдҗахш

11-04-2024, 14:38 | Общество

Эндр олн келн-улсин хоорндк иньгллтд нег үлү ик оньг өггдҗәснә учрнь цань уга сәәнәр медгдҗәнү эсий? Эң-зах уга, у-өргн һазр эзлҗәдг мана ик орн-нутгт кедү келн-улсин элчнр кесгәс нааран хоорндан ниитәһәр, ах-дүүһинәр бәәнә биший!Тегәд чигн эдн нег-негән дөңнҗ, ээм-ээмән түшлдҗ бәәхлә, Әрәсән күчн бас өсәд-өргҗәд йовхнь лавта медгдҗәнә. Мана таңһчд чигн ирлцңгү халхар үлгүр болгч кедү улс бәәнә гиһит…

Ода болхла эн туст учрсн нег өвәрц йовдлын тускар эврә умшачнртан медүлх седкл үүдв. Орн-нутгин захд гишң бәәршлҗәдг хол Якутяс шидр генткн хонх җиңнв. Алң болад, ода кен болхв, гиһәд дотран ухалм цацу телефонд мини таньл, Саха Республикин «Ил Тумэн» барин Герин ах редактор Мария Христофорован дун соңсгдв. Эврә үүрмүд-седкүлчнриг соньмсулх нег зәңгәр хувалцхар седләв, гиҗ келн, мөчн сард барас һарсн «Күрүлгэн» гидг утх-зокъялын эднә седкүлд Хальмгин бичәч, орчулач, олна үүлдәч, Төрскән харсгч Алдр дәәнд орлцач Хоньна Михаилын тускар шишлң халхс барлгдсинь зәңглҗ, хальмг газетин көдләчнрт халун мендән илгәв.

Бидн болхла Мария Николаевнад зүркни ханлтан өргҗ, тер дарунь гилтә эн седкүлин ах редактор Афанасий Гуриновла-Арчыланла (зургт) залһлда бәрҗ, эн йовдлын тускар тодрхаһар келҗ өгхинь сурвидн. Энүнә үгәр, Хоньна Михаил хол җирдгч җилмүдт Якутин бичәчнрлә үүрлҗ, эднә үүдәврмүд орчулҗ йовсн учрар 1962 җилд мана «Хальмг үннд» Якутин бичәч Иван Алексеевин «Ырыа» («Дун») гидг шүлг хальмг келәр барлгдсн бәәҗ. 1967 җилд болхла «Социалистическая Якутия» гидг эднә газетд Хоньна Михаилын «Ухлястин көвәд» гидг дәәнә цага келвр орс келәр барлгдснь бас тууҗд орсн болв.

(полную версию статьи можно посмотреть в бумажной версии выпуска № 37 (19018) 11 апреля 2024 года, четверг)

Шагҗин Любовь

Видео