Йовһар балһсна уульнцсар

11-04-2024, 14:46 | Общество

Җил болһн мөрн сарин эклцәр цуг нарт- делкәд эрүл-мендин Өдр темдглгднә. Сән авъяст тохрсар эн өдр эрүл-менд батруллһна, чик авг-бәрц тархалһна керг-үүлдврмүд бүрдәгднә. Давсн амрлһна өдрмүдт Элстд «Эрүл-менд бәәхин төлә - 10 миңһн ишкдл» гидг керг-үүлдвр болв. Терүнд таңһчин эмнлһнә бүрдәцсин элчнр, хотл балһсна бәәрн улс орлцҗ, төв талвңгас авн «Иньгллт» парк күртл болн хәрү йовһар йовв.

Шишлң медицинск дөң күрглһнә «Сулда» төвин һардачин үүл дааҗадг Светлана Кусьминован келсәр, эрүл-мендин нарт-делкән Өдрт нерәдәд, таңһчин эмнлһсин седвәрәр чик авг-бәрц батрулхин төлә эн керг-үүлдвр бүрдәгдв. «Дигтә эн өдрмүдт бамб цецгин наадм болҗана, тегәд ирлцңгү керг сара хонгтан амрлһна өдрмүдт болхмн. Чик авг-бәрцәр бәәдг улс эмчнрлә хамдан балһсна паркар йовһар йовҗ, эрүл-мендән батрулҗ чадҗана. Эн керг-үүлдвр җил болһн давулгдна, тегәд сән авъяст тохрв гиҗ келҗ болхмн. Мана хотл балһснд чик авг-бәрцәр бәәдг улс баһ биш бәәнә», – гиҗ Светлана Валерьевна келв.

«Сулда» төвин әңгин эмч Евгения Пономарева болхла өрүн болһн цогц-махмудан тинилһҗ, өдр болһн йовһар йовна. Зәрмдән көдлмшин кергәр йовсн цагтан өдрт 10 миңһнәс үлү ишкдл кегднә гиҗ эн келв. Эмчин тоолврар, йовһар йовдг күүнә эрүл-мендин бәәдл бат болна, ханядн-тому энүнд хальдхш. Эрүл-мендин нарт-делкән ниицәнә сүв-селвгәр күн болһн 6-10 миңһн ишкдл кеҗ йовһар йовх зөвтә. Нег үлү көдлмштән өдртән суудг болхла өрүн асхнднь йовһар йовхла сән болхмн – гиҗ Евгения Ивановна селвг өгв.

(полную версию статьи можно посмотреть в бумажной версии выпуска № 37 (19018) 11 апреля 2024 года, четверг)

ДООҖАН Наталья
ЗУРГТ: йовһар йовад, 10 миңһн ишкдл кесн улс

Видео