Ачта багшин нер мөңкрүлв

11-04-2024, 14:58 | Общество

Элстин политехническ колледжд Борис Шевкиевин нертә стипендь хамгин сән оютнрт бәрүлҗ өггдв.

Борис Андреевич Шевкиев сурһулин эн бүрдәцд 40 җилдән көдлсмн. 1976 җилд Элстин автохаалһин техникумд (ода политехническ колледж) Борис Шевкиев ирҗ көдлв. 2016 җил күртл нег ормдан баһчудт дунд шишлң сурһуль өглһнә халхар Борис Андреевич көдләд бәәв. Эн олн җилин туршарт энүнә һардврт таңһчин эдл-ахун төлә, тер дотр автомобильн көлгн-күчнә халхар кесг мергҗлтнр белдгдсмн. Әрәсән дунд профессиональн сурһулин күндтә көдләчин, Әрәсән ачта багшин күндтә нер зүүлһҗ, багш болн сурһмҗлач Борис Шевкиевин ик ач-туснь үнлгдсмн.

Борис Андреевичин өрк-бүлнь ачта багшин нертә стипендь тогтах шиидвр авсмн. Җил болһн сурһулян сәәнәр сурдг, олна үүлдврт орлцдг, соньн төсвс ухалҗ һарһдг оютнр тер стипендяр мөрәлгдхмн. Софья Эдлеева болн Максим Ностаев (зургт) түрүңкснь болҗ эн стипендиг авв. Эдн сурһулян йилһән сәәнәр сурна, волонтермуд болад, буйнч седклин олн керг-үүлдврт орлцҗана. Профессиональн билг-эрдмин марһанд чигн эдн мөрә авсн оютнр болҗана.

Элстин политехническ колледжин һардач Галина Васькинан келсәр, сурһулин эн бүрдәцд кергтә эрдмәр энд оютнр белдвр авна. Б. Шевкиевин нертә мөрә тогтаснь сурһулян сәәнәр сурч, эрдмән арднь орҗ дасх сән урмд оютнрт өгчәнә.

Өрк-бүлин җилд иим мөрә тогтасн Шевкиевихнә бүл Борис Андреевичин кесн көдлмшинь үнлсн деерән, таңһчд медрлтә болн сән мергҗлтнр олар белдлһнд зөвтә тәвцән орулҗана.

ҖИРҺЛИН Кермн

Видео