Көдлмшч ормсин яарм болх

26-03-2024, 09:15 | Общество

Әмтиг көдлмшәр теткхин, эврә керг бүтәхин, баһчудт эрдм шүүҗ авхд дөң болхин төлә мана орн-нутгт көдлмшч ормсин яарм бүрдәгднә. Әрәсән залврин Ахлачин дарук Татьяна Голикован даалһврар нидн тиим яарм орн-нутгин регион болһнд, тер тоод мана таңһчд болсн билә.

Шидр таңһчин социальн делгрлтин, күч-көлснә болн көдлмшәр тетклһнә министрин дарук Маминә Ольга эн керг-үүлдвр бүрдәлһнә төрәр цәәлһвр өгв. Эн җил яарм хойр девсңгәр болхмн, түрүләд региональн кемҗәнд мөрн сарин 12-т, хөөннь шаңһа мөчн сарин 28-д болхмн. Мана таңһчд эн керг-үүлдвр давулхин төлә бүрдәмҗин комитет тогтагдсн бәәнә, терүг Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Марина һардв.
- Ода деерән 44 бүрдәц яармд орлцхан медүлв, эдн ут тоодан 200 көдлмшч орм бәәхин тускар зәңглв. Нурһлҗ сурһуль-эрдмин, эрүл-менд харлһна болн селәнә эдл-ахун халхст көдләчнр кергтә болҗана. Яармд олн зүсн төрәр һурвн талвң үүлдхмн. Көдлмш хәәҗәдг улсин төлә көдлмшч ормсин тускар медүлх, эврә керг бүтәх саната улсин төлә социальн бооцана тускар цәәлһвр өггдх, таңһчин дунд шишлң болн ик сурһулин бүрдәцсин элчнр ямаран эрдм дасч чадхин тускар баһчудт келҗ өгх. Шишлң цергә керг-үүлдврт орлцачнрт, гемтә-шалтгта улст, баһчудт ик оньг тусхагдҗ, көдлмш олҗ авхд дөң күргх, – гиҗ Ольга Борисовна келв.
Яарм мөрн сарин 12-т Амр Санана нертә Келн-улсин дегтрин саңд 10 часла эклхмн. Көдлмш уга улст терүнд орлцх үрвр кегдҗәнә.

Белдснь ДООҖАН Наталья

Видео