Медәтнрин түрүн нөкд болна

26-03-2024, 10:20 | Общество

Городовиковск района әмтнә социальн теткврин комплексн төвин социальн көдләчнр һанцарн бәәдг медәтнрт болн гемтә-шалтгта улст нөкд болҗ, эднд өөрхн элгн-садн мет болна. Өдр болһн гилтә эдн медәтнрт хот-хоолынь, эминь хулдҗ авч, геринь ахулҗ, сад-һарудт көдлҗ дөңгән күргсн деерән теднлә сууһад, ю-бис күүндҗ, баһ цага тодлврмудынь соңсна.

Эндр района КЦСОН-д 36 социальн көдләчин хәләврт 317 медәт бәәнә. Нәәмн җил хооран Наталья Басанова социальн теткврин комплексн төвд ирҗ, социальн көдләчнрин зергләнд орв. Эн җилмүдин эргцд Наталья Николаевна көдлмштән дааврта, өр-өвч седклтә, әмтнлә тевчңгү күн болҗ олн дунд күндллһ олв. Ода энүнә хәләврт йисн күн бәәнә, эдн цуһар һанцарн бәәдг медәтә улс болна, тегәд социальн көдләчин килмҗ болн дөң угаһар эдн бәәҗ чадхш.

- Би күн болһнд долан хонгт хойр дәкҗ эрк биш одх зөвтәв. Болв эдн дал һарсн медәтә болн гемтә-шалтгта улс болна, тегәд чадсарн һурвн-дөрвн дәкҗ чигн одад, мендинь медәд, хот-хоолынь болн эминь күргҗ өгхәр шуннав. Дәкәд телефоһар залһлда бәрҗ, ямр нег төр учрхла күүнднәвидн. Коммунальн туслмҗин мөңгинь өгнәв, гер-бүүрин нань талдан төрмүд хаһлнав. Гер дотр ахулад, цевр-цер бәәдл тогтанав. Медәтин сурврар халун хот болһнав. Мана медәтнр һаза цецгүд урһахдан дурта, тегәд хамдан сад-һарудт көдлнәвидн. Көдлмшән күцәһәд, сул цаг учрхла бидн күүндәд, хуучн зургуд хәләнәвидн. Һанцарн бәәдг күүнд чееҗин киләсән һарһҗ күүндх кергтә, тегәд күн болһнд килмҗән тусхах кергтә. Зәрм медәтнрин күүкднь таңһчин меҗә һатц бәәнә, хая нег амрлһндан ирнә, зәрмнь болхла үрн уга һанцарн көгшрҗәнә. Иим улст нег үлү цаһан седклән нерәдҗ, оньган тусхах кергтә, –гиҗ Наталья Николаевна келнә.

(полную версию статьи можно посмотреть в бумажной версии выпуска № 30 (19012) 26 марта 2024 года, вторник)

БАТАН Сәәхлә
ЗУРГТ: социальн көдләч Наталья Басанова медәт Любовь Дмитриевна Суриковад золһҗ ирв

Видео