Хальмг теегин үрн Манҗин Аркадин бумб

16-04-2024, 09:00 | Общество

- Мини зүркн хальмг һазрт - гиҗ дуулдг дунь эн өдрмүдт мана уханд орҗ, седклд өргмҗ үүдәнә. Хальмг улсин хамгин дурта көгҗмч Манҗин Аркадин нериг болн үүлдвриг мөңкрүлсн йовдл Хар Һазра района Артезиан селәнд мөрн сарин 13-д болв. Хальмгин Баатр, Хальмг Таңһчин билг-эрдмин ачта үүлдәч, көгҗмин нарт-делкән эрдмч болҗ туурсн Манҗин Аркадьт Артезианд бумб босхгдв.

Хальмг Таңһчин частр күңкнҗ ончта эн йовдл эклв. Хальмг улсин омгинь өргдг эн сүркә көгҗм үүдәсн Аркадин нерн тууҗд үлдхнь лавта. Заяни билгтә теегин үрн келн-улсиннь билгиг олнд медүлсн кесг ду, көгҗмин ик үүдәврмүд бичсмн. Классическ болн улсин көгҗмин цуг янзар көгҗмч Манҗин Аркадь олн үүдәвр үлдәснь мана чилшго зөөр болҗана.

Төрскн теегәрн адһҗ ишкҗ йовх, һартан көгҗмин зевсгән бәрсн дүр бумбин өөдмәс цуглрсн улс тал темцсн болв. Таңһчин сойлын болн зуульчллһна министр Саглр Тюрбеева, Хар Һазра района толһач Виталий Крылов, Лаганя района толһач Юрий Когаев, «Мана зөөр» буйнч седклин саңгин ахлач Иван Басангов, Әрәсән Өмн үзгин «Агролесофитомелиорацин» Ассоциацин ахлач Константин Бембеев, нань чигн улс Манҗин Аркадин үүлдврин ач-тусинь темдглҗ келв. Ахнь Борис Манджиев болн Аркадин гергнь Ирина Манджиева келсн үгмүд әмтнә седклд күрч, чееҗинь девтәҗ, Аркадин олн халхта билгтә дүринь мана уханд сергәв.

(полную версию статьи можно посмотреть в бумажной версии выпуска № 39 (19020) 16 апреля 2024 года, ВТОРНИК)

ХӨӨЧИН Галина

Видео