Келн-улсин төсвс күцәлһнә төрмүдәр күүндв

16-04-2024, 09:06 | Общество

Хальмг Таңһчин Улсин Хуралын (Парламентин) Ахлач Артем Михайлов Приютна болн Ик Буурла райодт одад, келн-улсин төсвсин медлд күцәгдҗәдг керг-үүлдврмүдин йовудыг бүрткәд, бәәрн улсла харһҗ күүндв.

Районд эн җил И.Карпенкон нертә Приютное селәнә лицейд бат ясвр кегдҗәнә. Улсин Хуралын Ахлач района толһач Манжика Басңла ясврин йовудыг хәләв. Ода деерән сурһулин бүрдәцд түрүн девсңгин көдлмш төгсв, тосхачнр ораһинь сольҗана, бәәрин ул батрулҗана, эрсмүдинь шалдҗ шинрүлхәр белдҗәнә. Бат ясвр күцәлһнд 122 сай арслң олзлгдхмн, сурһулин эргндк һазриг ахулҗ сән кец-таал тогталһнд бәәрн хазнас немр мөңгн йилһгдхмн.

Артем Михайлов ясврин йовудыг хәләһәд, тосхлтын көдлмш батлгдсн диг-даранла ирлцҗ күцәгдҗәнә гив. «Хуучн бәәрнд төрмүд учрна, болв тер бийнь тосхачнр ясврин көдлмшиг цаглань төгсәх гиҗ ицҗәнәвидн. Приютна районд лицей хамгин ик сурһулин бүрдәц болна, энүг дәәнә өмн тосхсмн, тер учрар ясврин көдлмшин йовудт кесг тоотыг шинрүлҗ сольх кергтә. Ясврин көдлмш цаглань төгсәсн деерән сурһулин болн нань чигн талдан хорасиг сурһульчнрт болн багшнрт тааста кевәр зуралҗ тосхх кергтә», - гиҗ Артем Васильевич темдглв.

(полную версию статьи можно посмотреть в бумажной версии выпуска № 39 (19020) 16 апреля 2024 года, ВТОРНИК)

БАТАН Сәәхлә
ЗУРГТ: Приютна лицейд бат ясврин йовудыг бүрткҗәнә

Видео