Көдлмш хәәҗәдг улст туслхар

16-04-2024, 09:10 | Общество

Хойр җил дарандан мана орн-нутгт «Әрәсән көдлмш. Арһта цаг» гидг көдлмшч ормин яарм бүрдәгдҗәнә. Эн хойр девсңгәр болна, түрүләд орн-нутгин регионмудар региональн девсң, хөөннь федеральн чинртә яарм болхмн. Мөрн сарин 12-т А.М.Амр-Санана нертә Келн-улсин дегтрин саңд эн керг-үүлдврин региональн девсң болв.

Эн җил яармд таңһчин 50 һар бүрдәц орлцад, кедү көдлмшч орм бәәхинь, ямаран эрдмтә көдләчнр эднд кергтә болҗахинь медүлв. Таңһчин дунд шишлң сурһуль-эрдмин бүрдәцс эн кергт орлцҗ, эн керг-үүлдврт орцлсн хотл балһсна сурһульчнрт ямаран эрдм дасхдгин тускар келҗ өгәд, оютнрин күцәмҗин тускар хувалцв. Тегәд эн яарм таңһчин бүрдәцст, көдлмш уга улст, сурһульчнрт болн оютнрт туста болснь лавта.

Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина яармиг нүр үгәр секәд, нидн түрүн болҗ давулгдсн керг-үүлдврт 93 бүрдәц орлцад, 500 һар көдлмшч орм бәәхиг медүлсн билә, аштнь 245 күн көдлмш олҗ авв гиҗ темдглв.

- Энтн йир сән күцәмҗ болв гиҗ келҗ болҗана. Эндр мана таңһчд селәнә эдл-ахуд мергҗлтнр болн көдләчнр кергтә. Үлгүрнь, Яшкулин района тохма мал өскдг «Улан хөөч» гидг эдл-ахуд зоотехникч, малын эмч кергтә. Келн-улсин төсвс күцәгдҗәхәс иштә тосхлтын болн хаалһин эдл-ахун халхс сәәнәр делгрҗәнә, эднд бас көдләчнр керглгдҗәнә. Авъяст тохрсар, сурһуль-эрдмин болн эрүлменд харлһна бүрдәцст бас көдлмшч ормс бәәнә. Сурһулян төгсәҗәдг оютнр бәәрн бүрдәцст ямаран мергҗлтнр кергтәг медҗ авч көдлмш олҗ авч чадҗана. Сурһульчнрт болхла эн керг-үүлдвр иргчдән эрдм шүүҗ авхд туслх чигн биз. Ода мана таңһчд тосхлтын, селәнә эдл-ууш эд-бод кедг мергҗлтнр кергтә. Сүл цагт баһ наста арһлачнр олн зүсн хувц-хунр уйдг эврә керг бүрдәҗ үүлдҗәнә, тегәд уячин эрдмтә улс бас бачм кергтә болҗана. Эн яарм көдлмш хәәҗәдг, шин эрдм дасх саната болн эврә керг бүтәхәр зуралҗадг улст, эрдм шүүҗ авад уга баһчудт туста болтха», - гиҗ Марина Петровна дурдв.

(полную версию статьи можно посмотреть в бумажной версии выпуска № 39 (19020) 16 апреля 2024 года, ВТОРНИК)

ДООҖАН Наталья
ЗУРГТ: Хальмг Таңһчин залврин Ахлачин дарук - таңһчин социальн делгрлтин, күч-көлснә болн көдлмшәр тетклһнә министр Өлзәтин Марина яармд орлцачнрла күүндҗәх кем

Видео