Бамб цецгин наадм сән йовудтаһар давҗана

16-04-2024, 09:15 | Общество

Бамб цецгин наадм таңһчин райодар цаарандан давҗана. Бемб өдрлә көтчнрәхн гиичнрән тосв. «Тууҗар учрсн, тууляр урһсн Бумбин орн…» гидг нәр-наадн олна оньгт тусхагдв.

Таңһчин гиичнр болн бәәрн улс Көтчнрә өөр ишкә гермүдәс тогтсн хотнд олар цуглрв. Селәндин муниципальн бүрдәц болһн эврә ишкә герән углҗ босхҗ. Дотрнь орхла селән болһна тууҗла, күцәмҗлә таньлдҗ болхмн. Хотн болһна өөр домбрин айсмуд соңсгдҗ, хальмг би биилсн улс үзгдв.
Байрин керг-үүлдвр ке-сәәхн хувцта хальмг келн-улсин туульсин дүрмүдин йовлһнас эклв. Мана теегт бәәдг олн зүсн аңгудын хувцта улс тәәз деер һарч тавшад биилв.

Көтчнрә района муниципальн бүрдәцин толһач Санл Годжуров ирсн гиичнрт халун мендән илгәҗ, нег һазра улсиг болн нәәрт орлцсн зуульчнриг йөрәв. Энүнә келсәр, бамб цецгин наадмд җил ирвәс олн гиичнр ирҗәдг болв, эдн мана тууҗла, өвәрц авг-бәрцлә өөрхнәр таньлдад, мана таңһчин тускар эврә һазртан күргҗ медүлнә. Тер мет байрин концерт хәләҗ, олн зүсн марһаст орлцҗ, шимтә хот амсч, цаган сергмҗтәһәр давулҗ чадҗанат гиҗ эн келв. Байрин нәр-нааднд Көтчнрә района сойлын коллективс орлцҗ, билг-эрдмәрн олн-әмтиг байрлулв.

(полную версию статьи можно посмотреть в бумажной версии выпуска № 39 (19020) 16 апреля 2024 года, ВТОРНИК)

ӘМТНӘ ТООЛВР:


Ульяновск балһснас ирсн Олег болн Ирина Сидоровихн:

– «Бамб цецгин наадмд хойрдад ирвидн. Энд тогтсн үр-иньглгч таал болн цаһан седклтә улс мадна седкл авлв. Хальмг Таңһчин өвәрц сойл, авг-бәрц бас йир таасгдв. Тана ке-сәәхн хувцн, би болн көгҗм, шимтә хот – цугнь мадниг өврүлв. Улан, шар бамб цецгүд хальмг теегин кеермҗ болҗахинь үзвидн, тегәд иргчдән нааран дәкн-дәкн ирәд бәәхвидн

Курск балһснас ирсн Татьяна Моргунова:

– Хальмг Таңһчд мини сән нәәҗнр бәәнә, эднә үрврәр бамб цецгин наадмиг хәләхәр ирүв. Хамгин түрүнд тана шимтә, әмтәхн махн йир таасгдв. Хальмгуд цаһан седклтә, тевчңгү, һольшг улс болҗахнь медгдв. Темәг түрүн болҗ өөрхн үзүв, урднь болхла зуг зоопаркд энүг үзсн биләв. Һаза дулан, тегәд ирх өдрмүдт теегт һарад, бамб цецгүд хәләхәр зуралҗанав.


КАРСАНА Евгения

Видео