Музей болн бичкдүд

16-04-2024, 10:02 | Общество

Псков балһснд «Музей болн бичкдүд» нертә Цугәрәсән номиндамшлтын хург болв.

Хазнас, Калининградас, Лаганяс, Псковас болн Әрәсән нань чигн балһсдас ирсн багшнр болн сурһульчнр илдкл болн соңсхврмуд кев.
Хургин көдлмшт 22 күн орлцв. Төрскнч седкл сурһлһна төрмүд хургт хәләгдв. Улсин сойлын җирһлд нег өркбүлд хадһлгдҗадг әрүн тоот ямаран чинр зүүдгин туск тоолврта соңсхвр әмтнә оньг авлв. Ах үйин үлгүр, улсин авъясмуд бичкдүдин болн баһчудын сурһмҗд нилчән күргдгин тускар тохнята күүндвр болв.

И. Люлякинә нертә Лаганя 1-ч тойгта сурһулин сурһульчнр Анжелика Бочарникова болн Злата Носкова эн хургт эврәннь шинҗллтин көдлмшән соңсхв. «Европд бәәдг Мәәдр гегәнә хамгин ик көшә» болн «Әрәсән балһсдын хальмг нердин тускар» гиҗ нерәдгдсн шинҗллтән сурһульчнр багш Зоя Михайловна Очирован һардврт күцәсмн.

Хургин көдлмшин ашар Лаганя сурһульчнрин шинҗллтс нүр ормд һарад, негдгч девсңгин дипломсар ачлгдв. Номин ик хургт орлцсн сурһульчнр Псковин соньн тоотла таньлдв. А. Пушкинә «Петровское» гидг музей-заповедникд одсн йовдл сурһульчнрт икәр таасгдв.

ҖИРҺЛИН Кермн

Видео