Цергчнрт дөң болхар

23-04-2024, 09:02 | Общество

Шидр «Төрскән харсачнр» гидг шаңһа саңгин медицинск дөң күрглһнә заллтын һардач Александр Григорьев Элстүр ирәд, П.Жемчуевин нертә таңһчин эмнлһнд одад, шишлң цергә керг-үүлдврт орлцачнрт ямаран дөң күргҗәхиг хәләв. Энүнлә хамдан таңһчин эрүл-менд харлһна министрин дарук Сарңга Гиләш болн «Төрскән харсачнр» гидг шаңһа саңгин региональн әңгин һардачин дарук Чилгрә Байрта эмнлһнд одв.

Эн җилин эклцәс авн таңһчин эмнлһнә травматологийин болн физиотерапийин әңгүдт 85 цергч, тер тоод СВО-д орлцачнрин өрк-бүлмүдин гешүд бас эмнлһ авв. Ода 11 цергч энд эмнүлгдҗәнә. Эмнлһнә ах эмч Чумпина Саглрин келсәр, шишлң цергә керг-үүлдврт орлцачнр эрүл-мендән батрулхд ик оньг өггднә. Эмнлһнә реабилитацин әңгд өдгә цага сән кергсл углҗ тәвгдсн бәәнә, тернь шав авсн цергчнрт цогц-махмудан батрулҗ сәәнәр эдгхд олзлгдна. Хальмг Таңһчин Толһач Хаска Батун дөң-тусар сүл цагт эмнлһн үнтә болн сән һара кергсләр теткгдв. Үлгүрнь, LokomatPro гидг робот шав авсна хөөн чинән уга көл-һар батрулхд сәәнәр туслна. ЛФК-н хорад болн талдан әңгүдт бас шин кергсл бәәнә.

- Цергчнр энд өдртнь ирҗ эс гиҗ эмнлһнә әңгд бәәҗ эрүл-мендән батрулна. Мана эмчнр эмнлһнә халхар дөңгән күргнә, кергтә болхла орн-нутгин нүүрлгч төвмүдин мергҗлтнрлә залһлда бәрҗ, теднә сүв-селвг авна. Энд эмнлһ күцәх арһ уга болхла шаңһа төвд месллһ кех арһ хәәнәвидн. Шишлң цергә керг-үүлдврт орлцачнрт килмҗән тусхаҗ, түрүн сурврарнь дөң күргнәвидн. Бидн таңһчин эрүл-менд харлһна министерствлә болн «Төрскән харсачнр» гидг шаңһа саңгин региональн әңглә нөкцҗ үүлднәвидн, - гиҗ ах эмч темдглв.

БАТАН Наталья

Видео