Өрк-бүлән эврә эдл-уушар теткҗәнә

23-04-2024, 09:04 | Общество

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңгәр, 2023 җилд 585 өрк-бүл социальн бооца батлв. Теднәснь 244 өрк-бүл эврә керг секв, 79 күн онц эдл-аху бүрдәв. Социальн бооца батлсн улст шаңһас 109,4 сай арслң йилһгдв. Эврә керг секлһнд 350 миңһн арслң, онц эдл-аху бүрдәлһнд 200 миңһн арслң өггднә. Эн җилин эклцәс авн 49 күн социальн бооца батлсн бәәнә, теднәснь 22 күн эврә керг бүрдәв, 7 өрк-бүл шаңһа мөңгиг онц эдл-аху бүрдәлһнд олзлв, 13 күн көдлмш олҗ авв. Бооца батлсн улст ут тоодан 7,5 сай арслң йилһгдв.

Нидн социальн бооца батлсн улс дунд Городовиковск района Чапаевское селәнд бәәдг Данара Скиба заагдв. Эн шаңһа көтлврт орлцад, йилһгдсн мөңгәр онц эдл-ахуһан делгрүлв. Данара Васильевнан келсәр, энүнд социальн бооца батлсна хөөн 200 миңһн арслң һарһҗ өгв. Һурвн җил хооран эднә өрк-бүл түрүн үкртә болв, деерәснь дәкәд хойр үкр хулдҗ авв. Дәкәд эдн авальтаһан сән тохмта така бәрнә, сад-һарудт олн зүсн темс, зер-земш урһана. Тиигәд эднә өрк-бүл бийән махар, үсәр, өндгәр теткҗ, темсиг болн зер-земшиг эд-бод кеҗ үвлд белднә. Олн үртә эк үс эд-бод кенә, тегәд эдн аадмг, өрм, ээзгә, тос дурндан иднә. Лавкас зуг өдмг, шикр-балта хулдҗ авна. Герин эзн Денис Владимирович селәнә эдл-ахуд көдлнә, тегәд малд кергтә хотар болн өвсәр теткнә. Дәкәд эдн эврә һазран нәәмәдллһнд өгәд, хоршасн мөңгәр малд хот белднә. Олн үртә өрк-бүлд эврә мал бәрснь олзта-туста болҗахиг Данара Васильевна темдглнә.

(полную версию статьи можно посмотреть в бумажной версии выпуска № 42 (19024) 23 апреля 2024 года, ВТОРНИК)

ДООҖАН Наталья
ЗУРГТ: Аня күүкнь такаст хот өгчәнә

Видео