28-ч әәрмин туурмҗта йовдлыг тодлулҗ

Шидр Яшкулин района Хулхта поселкд дөчн һар җил хооран зөргтә 28-ч әәрмин салдсмудт босхгдсн бумблвин өөр санлын керг-үүлдвр болв. Хальмг Таңһчин Залврин Ахлач Босхмҗин Гилән, Әәдрхнә мүҗин Залврин Ахлач Денис Афанасьев, хойр региона министерствсин болн ведомствсин һардачнр, баһчудын олна бүрдәцсин элчнр Төрскән харсгч Алдр дәәнә 79-ч җилд нерәдсн митингд орлцв.
Хам-хоша бәәдг регионмудын Залврин ахлачнр тер цагин туурмҗин тускар келҗ, чинринь медүлҗ, зөргтә йовдлыг мартх зөв угаһинь тодлулв. Тер мет Яшкулин района В.А.Ширяевин нертә Утта селәнә дунд сурһулин юнармейцнрт күндтә гиичнр шишлң хувцинь бәрүлҗ өгв. Басңга Баатрин нертә Келн-улсин театрин артистнр утх-зокъялын көгҗмин наад олна оньгт тусхав. Цергә-төрскнч седклтә баһчудыг өскдг бүрдәцин нүүрләчнрин нерн деерәс Мингиян Мустырев үг авч, юнармейцнрин нер һуталго, олна җисәнд тәвцән орулҗ йовхинь темдгләд, ханлтан өргв.
Митингд орлцачнр 28-ч әәрмин салдсмудын санлынь тевчәд, агчмин зуур тагчг зогсад, гүрмр цецгүд бумблвд тәвв. Терүнәс нань керг-үүлдврт орлцачнр цергә-туурмҗин музейд одв. Тенд хәәврин багмудын Ассоциацин һардач Халхинә Дмитрий 28-ч әәрмин туурмҗин, Хальмгин болн Әәдрхнә хамцу хәәврин көдлмшин тускар бас медүлв. Хулхтад бәәсн бумблвд дөрвн миңһн салдсин цогц оршагдсн бәәнә, гиҗ Дмитрий Владимирович тодлулв. Керг-үүлдврин чилгчәр цуг орлцачнр зармин хашар тоогдв.
БАДМИН Занда