Санлын һал таңһчд ирв

Хөн сарин 3-д Москва балһснд Александровск садт бәәдг Нерн уга салдсин үкәрин шидр «Санлын һал» нарт-делкән керг-үүлдвр экләд, мөңк һалас һал шатагдад, Әрәсән 33 регионд, 14 талдан орн-нутгт болн цергә шишлң керг-үүлдврин түрүн зергләнд йовдг орлцачнрт йовулгдв. Энүг Улсин фронт бүрдәв.
Москвад эклсн чинртә керг-үүлдврт нег һазра мана күүкн, Улсин фронтын шунмһа үүлдәч Бамбан Баина орлцв. Тендәс шатасн һалыг Баина Станиславовна гиигн машиһәрн 1500 шаху дууна һазр темцәд, Целинн района Троицкое селәнә «Скорбящая мать» бумблв тал авч ирв. Тенд Целинн РМО-н болн Троицкое селәнә һардвр, селәнә бүрдәцсин көдләчнр болн баһчудын олна бүрдәцсин элчнр санлын һалыг тосв.
Бамбан Баина авч ирсн һалыг селәнә бумблвд шатадг зөв Төрскән харсгч Алдр дәәнә ветеран Николай Ищенкод болн Б.Б.Городовиковин нертә Троицкое селәнә гимназин сурһульч Эрднин Элвгд өггдв.
Николай Ищенко үг авч, дәәнә амр биш цагт Төрскән яһҗ харсҗ йовсан тодлҗ, эндрк баһчудт сурһулян сәәнәр сурч, төрскнч седклтә улс болҗ өстн, гиҗ селвгән өгв. Бамбан Баинан келсәр, иим чинртә йовдлд орлцллһн йир дааврта болн чинртә болна. Тегәд мадна төлә әмән өгсн өвкнрин тускар бидн болн дорас өсч йовдг үйнр мартх зөв уга, гиҗ эн онц темдглв.
КАРСАНА Евгения