Сән гисн багшнрт – өөдән ачлвр

Ноха сарин 15-д Элстд, таңһчин багшнрин хург болв. Энд тер мет садмудын сурһмҗлачнр, сурһуль-эрдмин нань чигн салврин көдләчнр, бүрдәцсин һардачнр цуглрв. Түрүләд Әрәсән гегән-герлин министр Сергей Кравцовин келсн үг хургт орлцачнрин оньгт тусхагдв. Багшин тоомсринь өөдлүллһнә керг тер кевәрн һол чинр зүүҗәхинь министр темдглв.

Әрәсән Президентин зәрлгәс иштә классин һардачнрин болн сурһмҗин селвгчнрин демин мөңгнә кемҗән өсв. Багшнрин өгдг тооцаг баһруллһна халхар бас керг-үүлдвр күцәгдх. Ода цуг сурһульмуд шаңһа көтлврәр көдлдг болв. Ах классин төлә тууҗин даслур үүдәгдв. Тер мет тууҗин 5-9 классмудын болн обществознаня 9-ч классин хамцу даслур тогтагдх, тиим кевәр даслурмуд хулдҗ авлһна һару баһрулгдх гиҗ министр темдглв.
Сурһмҗин көдлмшиг ясрулхин төлә Цугәрәсән эк-эцкнрин комитет тогтагдҗана, түүнә әңгүд регионмудын сурһульмудт үүлдх. Ода орн-нутгин цуг сурһульмудт бат ясвр күцәгдҗәнә, «Кванториум», «Ай-ти куб», «Точка роста» гидг эв-арһс үүлдҗәнә, эдн йиртмҗ шинҗлдг болн инженерин-техникин кичәлмүдиг сурһульчнр улм сәәнәр дастха гисн күслтәһәр тогтагдла, эн үүлдвр цааранднь чигн күцәгдх, гиҗ министр заав, орн-нутгин һардвр болн залвр тер кергт ик оньган өгчәнә. 2025 җиләс авн бат ясвр садмудт болн колледжмүдт күцәгдх, сурһмҗ өглһнә хамцу диг-даран бас тогтагдх болв.
Цааранднь таңһчин залврин Ахлачин негдгч дарук Цернә Эрднь үг келв. Багшнрт болн сурһмҗлачнрт дааврта төр тәвгдсн бәәнә-эдн төрскнч седклтә иргниг өскх зөвтә. Сән чинртә болн цуг бичкдүдин болн арвтнрин орлцлһтаһар сурһуль-эрдм теткх зөвтәвидн. Тиим таалыг тогтахин төлә кесг керг-үүлдвр таңһчин Толһач Хаска Батун һардврт күцәгдҗәнә.
Сүл дөрвн җилин эргцд 47 сурһульд бат ясвр кегдв, хойр шин сурһулин гермүд тосхгдв, тиим кевәр сурһульчнрин төлә сурһулин сән таал тогтагдв. Эн көдлмш цааранднь чигн күцәгдх. Тер мет хальмг кел хадһллһна, багшнрин җалвиг өөдлүллһнә төрмүд таңһчин залврин һол оньгт бәәнә.
– Эн җил түрүн болҗ Хальмг ик сурһулин ул деер багшнрт немр эрдм өглһнә көтлвр күцәгдҗәнә, түүнә һаруг таңһчин залвр дааҗана. Әрәсән залврин кемҗәнд тиим туста дамшлтыг сән гиҗ темдглв. Хальмг ик сурһулин һардврт болн багшнрт ханлтан өргхәр седләв. Цааранднь чигн бидн хамцу кевәр эн көдлмшиг күцәхвидн. Тадниг таңһчин залврин нерн деерәс йөрәхәр седләв, таднд улм ик күцәмҗ дурдҗанав, – гиҗ Эрднь Николаевич товчлв.
Дарунь тәәз деер таңһчин Толһачин Ханлтын бичгәр ачлгдсн көдләчнр һарв. Тер тоод Элстин техникин лицейин хальмг келнә болн утх-зокъялын багш Дабҗан Өлзәт, Элстин олн салврта гимназин һардачин сурһулин- сурһмҗин халхар үүлддг дарук Лиҗһәрән Лариса болн нань чигн көдләчнр ачлгдв, өөдән ачлвринь эднд Цернә Эрднь бәрүлҗ өгв.
Цааранднь Хальмг Таңһчин ачта багшин өөдән нер зүүсн көдләчнрт иткл цаасинь болн темдгинь бәрүлҗ өгв. Тер тоод Яшкулин олн салврта гимназин эклц классин багш Гонин Байрта, Үст селәнә сурһулин эсвин багш Амулңга Валентина болн нань чигн мергҗлтнр өөдәнәр ачлгдв.
Дарунь багшнриг федеральн инспектор Александр Беляев йөрәһәд, теднд күцәмҗ дурдв. Элстин лицейин орс келнә болн утх-зокъялын багш Манҗин Елена Әрәсән ачта багшин өөдән нер зүүлһҗәдг темдгәр болн һашгар ачлгдв. Тиим өөдән ачлвр энүнд зүүлһснд Елена Куприяновна таңһчин Толһачд болн залврт, Элстин лицейд бат ясвр кеснд ханлтан өргв.
Тер мет Элстин гуманитарн лицейин һардач Бухан Денислав «Сурһмҗлачин үүлдврин төлә» гидг Әрәсән темдгәр ачлгдв. «Күндтә сурһмҗлач» гидг темдгәр Элстин 14-ч тойгта садын ах сурһмҗлач Раиса Афанасьеваг, тер мет баг көдләчнриг «Әрәсән Федерацин бичкдүдиг болн баһчудыг сурһмҗллһна күндтә көдләч» гидг күндллһнә темдгәр ачлв.
Таңһчин Улсин Хуралын (Парламентин) Ахлач Артем Михайлов багшнриг йөрәҗ, теднә көдлмшин таал цааранднь чигн ясрад йовтха гиҗ дурдҗ, бас ачлвринь бәрүлҗ өгв. Тер тоод «Хальмг Таңһчин номин ачта үүлдәч» гисн күндтә темдгинь болн иткл цаасинь ИКИАТ күрәлңгин әңгин һардач Улана Светланад бәрүлҗ өгв. Тер мет «Хальмг үнн» газетлә кесг җилин туршарт нөкцлтҗәдг таңһчин сурһуль-эрдмин болн номин министерствин әңгин һардач Увшин Зоя Улсин Хуралын (Парламентин) Ханлтын бичгәр ачлгдв. Цааранднь ик баг көдләчнр «Эрдмдән итклтә бәәснә төлә» гидг темдгәр ачлгдсн болдг.
Дарунь хургт орлцачнриг таңһчин залврин Ахлачин дарук, социальн делгрлтин, күч-көлснә болн көдлмшәр тетклһнә министр Өлзәтин Марина йөрәҗ, таңһчин залврин Күндллһнә һашгар, тер мет таңһчин залврин Ханлтын бичгәр бас багшнриг ачлв.
Түүнә хөөн сурһуль-эрдмин болн номин министр Әңгрә Булһн илкдл кеҗ, багшнрин күцәсн көдлмшиг өөдәнәр үнлҗ эн җил ЕГЭ-н болн ОГЭ-н шүүвриг сурһульчнр сәәнәр өгсиг темдглв. 300 болн 200 балл хоршасн сурһульчнр бәәнә, тер мет кесг сурһульчнр медальмүдәр ачлгдв гиҗ келв. Дәкәд министр «Әрәсән сурһуль-эрдмин салврин күндтә көдләч» гидг күндтә нер иткүлҗәдг цаасинь болн темдгинь ончрсн багшнрт бәрүлҗ өгв.
Таңһчин сурһуль-эрдмин профсоюзин ахлачин дарук Ирина Мололкина бас багшнриг йөрәҗ, профсоюзин дипломс болн Күндллһнә һашгуд бәрүлҗ өгснь бас темдгтә болв.
Хургт Хальмг Таңһчин демографин болн өрк-бүлин политикин тускар таңһчин залврин Ахлачин дарук, министр Өлзәтин Марина илдкл кев. Төрскнч сурһмҗин төрәр көтлвриг яһҗ күцәснә тускар Әрәсән бичкдүдин болн уйн настнрин төвин ах шинҗләч, «Навигаторы детства» төсвин таңһчин зүүцүләч Сараңкан Екатерина, Цугәрәсән «Движение первых» җисәнә таңһчин әңгин һардач Анхана Саглр, «Дәәч» цергә спортын төвин һардач Җаңган Чимид тоолврарн хувалцв. Тооһин технологийин тускар Элстин техникин лицейин эсвин болн зәңгллһнә багш, «Хальмг Таңһчин йилһән сән багш- 2024» гидг марһана дииләч Пүрбән Адьян келҗ өгв.

ТҮРВӘН Һуна