Оньгта көвүнә дөң-тусар

Ноха сарин 21-д, Элстин нег уульнцин хаалһд зеткртә йовдл учрв. Терүнә йовудт насни дигт күрәд уга көвүн шавтв. Зөв-йос эвдсн җолач ормаснь зулв. Тер дарунь гилтә тиигәрән ГАИ-н көдләчнр ирәд, орминь шинҗләд, зуг тенд видеобүртклһн уга болад, маши залад, көвү дәврсн күүг олҗ чадсн уга. Зеткртә йовдл учрад, хойр час давсн хөөн полицин көдләчнр тал генткн йистә көвүн өөрдҗ ирәд, җолачин чирә-зүсинь, машинә тойгинь, цугинь яһҗ болсинь цәәлһҗ келҗ өгв. Терүнә ашт көвүнә зәңглсәр, зеткртә йовдлыг 59-тә бәәрн күн учраснь илдкгдв. Зөв-йос эвдсн күн дарунь олгдад, цааҗла харһулгдв. Полицин көдләчнрт нөкд болсн Очр-Һәрән Җирһлин нерн олнд медгдв.

Шидр Элст балһсна 17-ч тойгта дунд сурһулин дөрвдгч классин сурһульч, йистә Очр-Һәрән Җирһл эк-эцктәһән таңһчин дотр-дундын министр, полицин полковник Дмитрий Григорьевла харһв. Дмитрий Юрьевич көвүтә болн энүнә өрк-бүллә өөрхн таньлдад, сурһулин болн тааста кергүдин тускар соньмсв. Җирһлин эк Цаһан Давидовнан келсәр, көвүнь бичкнәсн авн ямр чигн тойгудыг тодлад авчкна. Элгн-садна чигн, эцкиннь үүрмүдин чигн цуг машидин тойгуднь меднә гив.
Җирһл өрк-бүлдән ууһн үрн болна, энүнд дү көвүн бәәнә. Сурһулян сәәнәр сурдг көвүн, кичәлмүдин хөөн бөк бәрлдәнә секцд одна. Иргчдән эмч болхар седҗәхән Җирһл күслән медүлв.
Тер мет харһлтын йовудт Очр-Һәрән Җирһлд Хальмгин МВД-н һардачин сандлднь суудг арһ учрв. Эн йовдл көвүнд байр-бахмҗ үүдәв, гиҗ темдглх кергтә. Дмитрий Григорьев эк-эцк Александр Владимировичд болн Цаһан Давидовнад көвүндән сән сурһмҗ өгәд өскснднь ханлтан өргв. Җирһлд бас ик ханлтан өргҗ, таңһчин МВД-н Күндллһнә һашг болн белгүд бәрүләд, көвүнд цаһан хаалһ дурдв.
– Очр-Һәрән Җирһл баһ наста болв чигн дааврта цагт дөңгән күргҗ чадснь йир темдгтә. Дорас өсч йовх көвүд-күүкд энүнәс эрк биш үлгүр авх зөвтә, – гиҗ министр ашлв.
КАРСАНА Евгения