Ачта экнриг күндлҗ йөрәв

Элстд давсн долан хонгин чилгчәр экин Өдрт нерәдсн байрин хург болв. Хальмг Таңһчин Улсин Хуралын (Парламентин) Ахлач Артем Михайлов, Хальмг Таңһчин залврин Ахлач Босхмҗин Гилән, Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина, олна бүрдәцсин элчнр терүнд орлцад, олн үртә, цергә шишлң керг-үүлдврт орлцачнрин экнриг сән Өдрлә йөрәһәд, бүлән үгмүд келв.

Хургиг «Алтн» гидг бичкдүдин бииһин ансамблин уйн наста биичнр секәд, цугтаһинь байрлулв. Байрин хург үр-иньгин сәәхн таалд давсиг темдглх кергтә. Ачлгдсн өрк-бүлмүд күүкдтәһән ирснь темдгтә болв. Эдн цуһар тәәз деер һарч алчвр авснь үзмҗтә болсмн. Олн үртә, олна бәәдл-җирһлд шунмһаһар орлцдг, күүкдтән чик сурһмҗ өгсн, үнн-чик седклтәһәр көдләд, сән мергҗлтнр болҗ үүрмүд дундан күндллһ олсн экнр эн өдр өөдән ачлвр авснь бахмҗта болсинь темдглхмн.
Хальмг Таңһчин залврин Ахлач Босхмҗин Гилән Хальмг Таңһчин Толһачин илгәсн йөрәлин бичгиг умшад, орн-нутгин һардвр өрк-бүлин чинр өөдлүлхин, нилхд төрлһиг урмдулхин төлә олн үртә эк-эцкнрт, саата күүкд улст шаңһа дөң күргдгин тускар онц темдглв. Гилән Герасимовна таңһчин Толһачин болн эврәннь нерн деерәс йөрәһәд, шаңһа ачлвр авсн өрк-бүлмүдиг темдглв. Әрәсән Президентин зәрлгәс иштә Мингиян болн Вера Бовалдыковихн, Утнасн болн Деля Дорджиевихн, Максим болн Эльза Шошаевихн «Эк-эцкин туурмҗ» гидг орденә медаляр, Хальмг Таңһчин Толһачин зәрлгәр болхла 11 өрк-бүл «Күүкдтән чик сурһмҗ өгсн төләдән» гидг темдгәр ачлгдв. Эдн цуһар тавнас үлү үртә чик сурһмҗ өгсн улс болна, күүкднь сурһулян сәәнәр сурна, спортын болн билг-эрдмин халхар ик күцәмҗ бәрсмн. Ачлгдсн өрк-бүлмүд дунд «Җилин сән гисн өрк-бүл» гидг Цугәрәсән марһанд орлцачнр заагдснь эдн олна кергт шунмһаһар орлцдг, билгтә, ниитә, седвәртә улс болҗахиг медүлнә.
Эк күн болһна җирһлд хамгин эңкр болдгиг Хальмг Таңһчин Улсин Хуралын (Парламентин) Ахлач Артем Михайлов темдгләд, экд нерәдгдсн шүлг олнд соңсхч умшв. Таңһчин Улсин Хуралын Ахлачин Ханлтын бичгәр ачлгдсн күүкд улс дунд көвүднь цергә даалһвран күцәҗ йовх экнр бас бәәсмн, эдниг цуһар бүләнәр тосч кесгтән альхан ташв. Көвүднь залу-зөрмгән үзүлҗ, цергә даалһвран үнн кевәр күцәҗ, хальмг баатрин нериг өөдән бәрҗ йовхнь экнрт ик бахмҗ болна. Эдн цуһар көвүднь әмд-менд хәрҗ ирхиг күләҗәнә.
Одахн «Сән гисн өрк-бүлин эдл-аху» гидг таңһчин марһана аш диглгдв, терүнд кесг өрк-бүл орлцҗ, эврә дөңцл эдл-ахуд олн мал асрҗадган олнд медүлв. Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина марһанд диилвр бәрсн өрк-бүлмүдиг йөрәв. Тиигәд, Яшкулин района Молодежный селәнд бәәдг өнр-өсклң Пашаевихн диилвр бәрәд, 100 миңһн арслңга мөрәһәр ачлгдв. Элстд бәәдг Даваевихнә өрк-бүл бас олн үртә болна, эдн балһснд бәәдг болв чигн эврә эдл-ахудан мал асрҗана. Эдн 2-ч орм эзләд, 50 миңһн арслңга мөрәһәр ачлгдснь байрта болв. Үстин района Татал селәнд бәәдг Малзрыковихн 3-ч орм эзләд, 30 миңһн арслңгар ачлгдв.
Байрин хургт орлцачнрт Хальмг Таңһчин ачта артистк Очкан Анна болн Брюгидикә Айса еңсг сәәхн дуд дуулҗ седкл байсав. Тегәд экин Өдр угтҗ болсн байрин керг-үүлдврт олн үртә, олна бәәдл-җирһлд шунмһаһар орлцдг, әмтн дунд күндллһ олсн күүкд улс сергмҗтәһәр амрв.
ДООҖАН Наталья
ЗУРГТ: Таңһчин залврин Ахлач Босхмҗин Гилән өөдән ачлвр авсн олн үртә Бовалдыковихниг йөрәв