Цугәрәсән марһанд ончрв

Дөрвн җил дарандан мана орн-нутгт сурһуль-эрдмин бүрдәцст көдлдг хот кедг улсин дунд шишлң марһан давулгдҗана. Дунд сурһульмудт өдгә цагин некврлә ирлцҗәдг кергсл олзлад, хотнь улм шимтә, сенр болтха гиһәд эн марһан бүрдәгдсн болдг. Хамгин түрүнд регион болһнд эврә марһан давна, терүнд ончрсн көдләчнр цугәрәсән ашлгч девсңд орлцх зөв авна.

Хальмг Таңһчд эн марһан сән йовудтаһар бүрдәгднә, дунд сурһульмудт арвтнриг шимтә хотар теткдг көдләчнр терүнд шунмһаһар орлцна. Эн җил тиим марһан Элстд давулгдад, Ик Буурл селәнә А.Пюрбеевин нертә дунд сурһулин замчнр ончрад, Мордовия Республикин Саранск балһснд болсн цугәрәсән марһанд орлцад ирсмн.
Үкр сарин 7-ас авн 10 күртл эн марһан Саранск балһснд болв. Әрәсән 75 регионас 110 баг марһанд орлцв. Әрәсән гегән-герлин Министерствин нилчәр энүг давулна.
Ик Буурл селәнә А.Пюрбеевин нертә дунд сурһульд көдлдг замчнр Анна Шилова, Надежда Панфилова, Ольга Настаева эдн марһанд орлцв. Делегациг сурһулин һардач Светлана Лиджиева ахлҗ йовла (зургт).
Замч Анна Шилован келсәр, тиим чинртә марһанд эн түрүн болҗ орлцв, тегәд орн-нутгин дунд сурһульмудт көдлдг улсла таньлдад, талдан балһсдын болн селәдин сурһульмудт бичкдүдт ямаран хот кедгинь үзсн болв.
– Марһана жюри һурвн багас тогтсн билә, тернь сурһульчнр, теднә эк-эцкнр, нертә замчнр болн технологуд мөн. Жюрин баг болһн марһанд белдсн хотыг хәләҗ, соньмсулҗадг сурврмудан өгч, хот болһн яһҗ белдгдсинь сурад, көдлмшиг үнлсмн – гиҗ Ик Буурла сурһульд көдлҗәдг замч Ольга Настаева келнә.
Марһана девсңгүдт орлцсн деерән олн регионмудас ирсн улс Саранск балһсна һәәхмҗтә ормар йовҗ, ке-сәәхн бумблвс үзв. Тер мет Мордовия Республикин тууҗла болн сойлла өөрхнәр таньлдв.
Цугәрәсән марһана ашар икбуурлахн орн-нутгин 50 сән гисн замчин тоод орв. Эн зәңг нег һазра улсин, нег үлү төрскн сурһулин багшнрин, арвтнрин болн эк-эцкнрин төлә ик байр-бахмҗ үүдәв.
Тодлхас, хойр җил хооран Ик Буурл селәнә А.Пюрбеевин нертә дунд сурһульд шаңһа көтлврин йовудт бат ясвр күцәгдлә. Эндр сарул, герлтә сурһульд арвтнрин төлә цуг таал тогтагдсн бәәнә. Хора болһнд ширәс болн сандлмуд шинрүлгдв, кичәлмүдин йовудт олзлгддг шин кергсл бас углҗ тәвгдв. Сурһульд дулаһар тетклһнә сурвлҗн бас шинрүлгдв, тегәд өдгә цагт сурһулин герт йир дулан.
Тер мет хот уудг хорад бас цугнь шинрүлгдв. Хот болһдг шин бешмүд, талдан чигн кергслиг өдр болһн олзлад, замчнр сурһульчнриг шимтә, әмтәхн, халун хотар теткҗәнә. Цугәрәсән марһанд орлцсн замчнрла хамдан эндр Айшат Омарова, Мария Зодбаева болн Байн Авяшева бас көдлҗ йовна. Эдн хоорндан ни-негн, бат өрк-бүл мет, багшнрин болн арвтнрин дунд күндллһ болн тоомср олҗ, седклән тәвҗ көдлнә. Завсртан халун хотан эдлсн көвүд-күүкд замчнрт ханлтан өргнә, чансн хотынь буульҗ, седклинь байрлулна.
КАРСАНА Евгения