Дурн чидл-омг үүдәнә

Сүл җилмүдт Әрәсәд, тер тоод Хальмг Таңһчд, гемтә-шалтгта улс орн-нутгин олна бәәдл-җирһлд болн эврә сән дурар үүлддг бүрдәцст шунмһаһар орлцҗ, спортын болн билг-эрдмин халхар ик күцәмҗ бәрҗ үлгүр-үзмҗ болна. Эдн шалтгта болв чигн билг-эрдмән делгрүлҗ, сурһуль сурч, тааста эрдмәрн көдлҗ, олна нүүрт йовхар шунна.
Мана орн-нутгт өрк-бүлин җил зарлгдсн бәәнә. Тегәд эндр Элст балһснд бәәдг Алексей болн Байрта Казанцевихнә өрк-бүлин тускар бичх седкл үүдв. Эдн олн җилдән нүднә харань муурсн улсин олна ниицәнә ханьд орҗана. Байрта Ик Буурла районд һарсмн, Алексей авальтаһан Элстд нүднә харань муурсн улсин бүрдәцд көдлҗәһәд таньлдв. Йирдгч җилмүдин эргцд олна ниицәнд эврә бүрдәц үүлддг билә, терүнд эрмдгтә улс махна зүүтә хот-хол кедг, гөлм өлгдг бәәсмн. Баахн цагтан таньлдад, эдн хөрн дөрвн җилдән ни-негн, байр-зовлңган хамдан хувалцҗ йовна. Ангелина күүкнь эк-эцкдән ик байр үүдәҗ һарв. Эн дунд сурһулян төгсәснә хөөн Т.Хахлынован нертә медицинск колледжд сурад, эрүл-менд харлһна көдләчин эрдмтә болв. Ангелина эк-эцкән хәләҗ, эдндән итклтә түшг болна. Ода эн хәрд һарад, эврә өрк-бүлтә болв.
Нүднә харань муурсн улсин таңһчин олна ниицәнә ахлачин нөкд Оруса Лидиян келсәр, Байрта болн Алексей Казанцевихн (зургт)гемтә-шалтгта улс болв чигн зовлңдан даргдлго, нег-негән дөңнҗ бәәнә. Эднә ниицән давулдг керг-үүлдврмүдт эдн орлцҗ, талдан гешүдлә бат залһлда бәрнә. Байрта ду дуулхдан дурта, тегәд билг-эрдмин марһан болхла эн эрк биш орлцна. Эн җил эдн Әрәсән сохр улсин ниицәнә седвәрәр Ростов-на-Дону балһснд болсн «Хойр җивр» гидг марһанд орлцад, талдан регионмудас ирсн өрк-бүлмүдлә таньлдв. Санкт-Петербург, Ярославль, Краснодар, Тюмень болн нань чигн балһсдын элчнр хоорндан марһлдҗ, хамдан олн зүсн даалһвр күцәв. Марһанд орлцачнр Ростов-на-Дону балһс һәәхч, бәәрн билгтнрин концерт хәләҗ, сул цаган сергмҗтәһәр давулснь эднд бас ончта болн байрта йовдл болв. Нег үлү өрк-бүлин җилд иим керг-үүлдврт орлцҗ, таңһчиннь нер һарһснь Алексейд болн Байртад бахмҗ үүдәв.
Тиим эгл өрк-бүл мадн дунд Элст балһснд бәәнә. Эдн нег-негән хәләһәд, җирһлин хаалһар хамдан йовна. Хөрн һар җил хооран эдн таньлдад, өрк-бүлән өндәлһәд, ор һанцхн күүкнәннь кишгт багтҗ йовхд эднә дурн болн иткл ик чидл болн омг өгнә.
Гемтә-шалтгта улсин нарт-делкән Өдрт нерәдҗ бар сарин 3-ас авн 13 күртл арвн өдрин туршарт олн зүсн керг-үүлдврмүд болна. Җил болһн Элст балһсна һардврин седвәрәр олна бәәдл-җирһлд шунмһаһар орлцдг, спортын болн билг-эрдмин халхд күцәмҗ бәрсн эрмдгтә улст мөрә бәрүлҗ өггднә. Эн Өдрт нерәдҗ шатрар марһан болна, буйнч седклин керг-үүлдвр чигн бас бүрдәгднә.

ДООҖАН Наталья