Эмиг амрар хулдҗ авхин төлә

Шидр Әрәсән Орн-нутгин Хүүвин эрүл-менд харлһна комитетин ахлач Башанкан Бадмин һардврт болсн селвлцәнд эмч бичҗ өгсн цаасар эмиг хулдҗ авлһна дамшлтын тускар күүндвр болв.
Башанкан Бадмин келсәр, эн төр Орн-нутгин Хүүвин бүртклһнд бәәнә. 2023 җилин моһа сард эклсн дамшлт 2026 җил күртл күцәгдхмн. Терүнд Москва балһсн, Московск болн Белгородск мүҗс орлцҗана. Эн дамшлтын медлд әмтн ниигмин сүлҗәнә эв-арһар эм хулдҗ авч чадҗана. Хамгин түрүнд эн хуучта улст тааста болна. Удан цагт эмнлһ авчадг әмтн эртәснь кергтә эмиг бичүлҗ авад, герүрн авхулҗ чадна. Роспотребнадзорин мергҗлтнр эн дамшлтд орлцҗадг улсин тоолвр медҗ авв, тегәд терүнә ашт 2456 күүнәс зуг хойр күн эн эв-арһ эс таасгдсиг заав.
Эн дамшлтд орлцҗадг улс нурһлҗ антибиотикуд, олн зүсн гемин өвдкүр баһрулдг эм хулдҗ авснь илдкгдв. 2023 җилин моһа сарас авн эн җилин үкр сар күртл 5 миңһн дәкҗ әмтн ниигмин сүлҗәнә эв-арһар эм хулдҗ авв. Тер мет эн дамшлтд орлцҗадг бүрдәцсин то бас икдснь темдгтә, ода терүнд 723 бүрдәц орлцҗана. Эн дамшлтын һол күслнь эм хулдҗ авлһиг тааста болн амр келһн болна. Ода дәкәд 14 регион эн дамшлтд орлцх санаһан медүлв. Энүнә йовудыг шинҗләд, сольвр болн чиклвр орулад, әмтн эмиг гертәсн һарлго хулдҗ авчахнь тааста болхмн. Башанкан Бадмин темдглсәр, хамгин түрүнд электронн рецептин негдсн реестр бүрдәлһн эркн чинртә болҗана, ода зәрм министерствс болн ведомствс эн көдлмшиг күцәҗәнә. Эн шинрлт мана орн-нутгт олзлгддг болхла, электронн рецептиг регион болһнд олзлҗ болхмн. Эн эв-арһ әмтнә җирһлин кемҗә ясруллһнд туслхнь лавта гиҗ Бадм Николаевич тоолҗана.
ДООҖАН Наталья