«Башантан яарм» төсв

Шидр Элстд «Балһсна сән кец-таал» гидг орн-нутгин төсвин керг-үүлдврмүд күцәлһиг тетклһнә ведомствс хоорднк комиссин дарани сүүр болв. Сүүриг таңһчин комиссин ахлач, таңһчин жилищн-коммунальн эдл-ахун болн энергетикин министрин үүл дааҗадг Мангута Виктория һардҗ давулв. Городовиковск балһсна муниципальн бүрдәц «Башантан яарм» төсвиг күцәлһнә тооцаһан өгәд, комиссин гешүдт кесн көдлмшин тускар келҗ өгв. Эн сүүрт таңһчин Улсин Хуралын депутат Хаалһин Очр орлцв.
Городовиковск ГМО бичкн балһсдт сән кец-таал тогталһна сән гисн төсвсин Цугәрәсән марһанд диилвр бәрәд, «Башантан яарм» тосхх зөв авсмн. Балһсна муниципальн бүрдәцин толһач Окуна Артем төсвин медлд ямаран көдлмш кегдсиг тодрхаһар келҗ өгәд, комиссин гешүдин сурврт хәрү өгв. Городовиковск балһсна һардвр сән кец-таал тогталһна төсвс күцәлһнә туст байн дамшлт хоршав, эдн района һардврла күцәмҗтәһәр хамцу үүлдҗәнә гиҗ Хаалһин Очр темдглв. Мангута Викториян келсәр, балһсна сән кец-таал тогталһна сән гисн төсвсин Цугәрәсән марһана неквр сольгдсна ашт 2025 җиләс авн терүнд бичкн балһсдас нань райодын төв селәд бас орлцҗ чадҗана.
Элст балһсна һардврин толһачин дарук Хаска Сергей хотл балһснд Басан Городовиковин нертә уульнцд сән кец-таал тогталһна төсвин медлд күцәгдҗәдг керг-үүлдврмүдин тускар келәд, ямаран тосхлтын көдлмш төгссинь заав. Шидр таңһчин Улсин Хуралын депутатнр энд модд суулһсн төләднь балһсна һардврин элч ханлтан өргв.

БАТАН Сәәхлә