Яармд хот-хол кимдәр хулдгдв

Давсн бембә өдрлә Элст балһсна негдгч микрорайонд селәнә эдл-ахун яарм болв. Хальмг Таңһчин селәнә эдл-ахун министерств болн Элст балһсна һардвр энүг бүрдәв.
Таңһчин нүүрлгч селәнә эдл-ахун бүрдәцс эврә эдл-уушан энд хулдв. Тедн дунд «Улан Хөөч», «Черноземельский,»«А.Чапчаевин нертә» тохма мал өскдг эдл-ахус, «Сарпа», «50 лет Октября» акционерн ниицәс, «Уралан» агрофирм ООО болн талдан эдл-ахусиг зааҗ болхмн.
Хальмгин селәнә эдл-ахун министрин үүл дааҗадг Гаван Тимурин келсәр, яармд орлцсн эдл-ахус эдл-уушан кимдәр хулдв. Эннь нег һазра улсиг икәр байрлулв. «Җил болһн намрар иим яарм бүрдәнәвидн. Таңһчин нүүрлгч эдл-ахус яармд эдл-уушан авч ирәд, немр үн немлго хулдна. Эндр ут тоодан 10 шаху тонн махн хулдгдв», – гиҗ Тимур Сергеевич темдглв.
Улсин Хуралын (Парламентин) депутат Кокан Михаил өрүн эрт яармд ирв. Михаил Улюмджиевичин келсәр, әмтн олар ирснь темдгтә, тер юңгад гихлә цуһар хальмг малын махиг кимдәр хулдҗ авхар адһв. «Давсн яарм одахн темдглгдсн селәнә эдл-ахун көдләчнрин сән Өдрлә ирлцүлҗ давулгдв. Иим керг-үүлдвриг җилд кесг дәкҗ давулх кергтә», – гиҗ депутат ухан-тоолврарн хувалцв.
Яармд хөөнә махн 400-450 арслңгар, үкрә махн болхла 300-350 арслңгар хулдгдв. Тер мет Нальчик балһснас ирсн арһлач Сайда Аликаева эдл-ахудан өсксн немш такан махиг 400 арслңгар хулдв. Нег һазра мана улс Шин җилин байрт белдхәр шовуна махиг бас хулдҗ авв. Заһсиг 150 арслңгар хулдв, «50 лет Октября» АО-д урһаҗ авсн тутрһ 90 арслң күрв. Терүнәс нань Әәдрхнә мүҗәс авч ирсн боднцг 50 арслң болв, Кыргызстанд урһсн альмиг 80 арслңгар хулдв. Үснә зүүтә хот-хоолыг яармд бас кимдәр хулдҗ авч болв.
Троицкое селәнәс ирсн Манҗин Валентина, яармд хөөнә шимтә мах кимдәр хулдҗ авсндан байрта бәәв. Энүнә келсәр, йириндән лавкст болн базрт хулддг махна үн яармд хулдсн үнәс икәр йилһрнә. Хөөнә хойр көл хулдҗ авув. Гертән ирәд, махан чанад, әмтәхн шөл уунав. Нег көлинь өөрдҗәдг Зулын байрт үлдәнәв, гиҗ медәт келв.
Элстд бәәдг Пүрвә болн Кермн Очировихнә темдглсәр болхла, эн яарм өөрдҗәдг Зулын болн Шин җилин байриг угтад давулгдснь йир сән йовдл мөн. Бидн өрүн эрт ирәд, кимдәр мах, заһс, зер-земш болн темс хулдҗ аввидн. Зул өөрдҗәһәд дәкн тиим яарм бүрдәхлә, йир сән болх билә. Таңһчин фермермүдт болн селәнә эдл-ахун министерствд ханлтан өргҗәнәвидн, гиҗ эдн келснь чигн орта болв.

КАРСАНА Евгения