Чинртә хургт орлцв

Таңһчин Толһач Хаска Бату «Иргчин экологин бәәдл» нертә нарт-делкән ик хургт орлцв. Йиртмҗин бәәдл харлһна Цугәрәсән ниицән энүг бүрдәв.
Йиртмҗин бәәдлиг әрүнәр хадһлҗ, иргчин төлә энүг харсх кергтә. Мана таңһч эн кергт тәвцән бас орулҗ йовна.
– Сүл тавн җилин туршарт гөрәснә тооһинь икдүлвидн. Дорас өсч йовх үйнрин орлцлһтаһар ирлцңгү керг-үүлдврмүд бас давулгдна. Урһа модд суулһнавидн, селәнә эдл-ахун халхиг делгрүлҗәнәвидн. Тер мет мана таңһчин ул деер һазрин көдәрлһиг зогсахин төлә өдгә цагин эв-арһс олзлад, хөөннь эн дамшлтыг талдан регионмудар тархахмн. Терүнәс нань Иҗл һолын усиг олзлад, таңһчин улсиг усар тетклһнә төсвин тускар бас келҗ өгләв. Әрәсән йиртмҗин көрңгин болн экологин министр Александр Козловд болн йиртмҗин бәәдл харлһна Цугәрәсән ниицәнә ахлач Вячеслав Фетисовд ханлтан өргҗәнәв. Вячеслав Александрович һардҗадг ниицәнә 100 җилин өөнләнь йөрәҗәнәв. Орн-нутгин өвәрц йиртмҗин бәәдл харслһнд цаарандан хамдан үүлдхмн, – гиҗ Бату Сергеевич темдглв.
ОЛЬДАН Цаһан