Зөргтә дәәч Дорҗин Бадм

СВО-н зергләнд хальмг олн көвүд дәәлдҗ йовхинь цугтан меднә. Таңһчин селән болһнас көвүд тенд нерән һуталго церглҗ йовна. Нег һундлтань мана көвүдин зөргтә үүлдврин тускар хая әрәсән соңсхврмудт болн барин һарцст келгднә. Шидр «РенТВ» телеүзлд «Лотос» гидг дуудвртаһар фронтд зөргәрн нер һарсн цергчин тускар келгдв. Дорҗин Бадм толһалҗадг цергчнр хортна бүслврт тусв. Тиигчкәд хортна то дөрвн холванд ик бәәснь хөөннь медгдв.

Зөргтә дәәч хальмг күн бәәснь бахмҗ үүдәв. Баатр үрн альд һарсн болхв гисн соньмслт үүдв. Дорҗин Бадм 2022 җилд хөн сард эврә сән дурар цергт мордад, цергә шишлң керг-үүлдврт орлцсмн. Тер цагас авн дәәлдәнә нүүрт йовна. Ода болхла шавтад эмнлһнд бәәнә. Хальмг баатр Бадмин келсәр, дәәлдәнә йовудт ямр болв чигн тоотыг оньгасн алдхла, әәмшг учрна. «Дәәлдәнә һазриг эргҗ шинҗлҗ хәләҗәһәд, тенд меҗә бәрҗ зогсх цегчнриг тәвҗәһәд, хортна дрон нисч ирсинь оньһсн угав, - гиҗ Бадм тер дәәлдәг тодлҗ келнә. Хортна дәврлтиг «Лотос» цергчнртәһән хәрү цокч, уралан йовуллго харсчасн меҗәһән бат кевәр бәрҗ зогссмн. Эн йовдл ДНР-ин һазрт болсмн. Энүнә цергчнр харсчасн бәәрн хойрдгч эшелонд бәәсмн. Эднәс тедүкнд бәәршсн цергчнриг хортн дәврәд, меҗәһинь таслҗ һархар һалзурв. Хортнд дөң болҗ техник ирв. Бадмин цергчнр харсчасн барун талас хортн дәврҗәнә. Күчтә дәврлһнд энд-тендкинь сәәнәр медҗ авад, чидлән диглхин төлә мана цергчнр невчк ардагшан цухрв. Тиигәд эдн дәәлдәнә нүүрт һарсн болв. Хаҗһр шиидвр авхла, хортна бүслврт тусх әәмшг учрв. Сөрлцҗәх чидл әдл биш болв. Мана нәәмн цергчлә хортна 30 салдс сөрлцҗәнә. Хамгин әәмшгтәнь артиллерийск халдан болна. Толһаһан өргдг арһ уга, тасрхан уга халданд дурндан шаргад нисчәх сумн тусх ик әәмшг бәәнә, гиҗ Бадм тер дәәлдәнә тускар тодлҗ келнә. Әәмшгтә тер кемд «Лотос» баһ наста цергчнрнь әмд үлдтхә гиҗ зальврҗ, цергә даалһвран дигтә кевәр эн күцәв. Командир эврә үүлдврәрн үлгүр болсн деерән цергч болһн ямаран йовхинь оньгтан авад, зәрминь бууляд, наадкинь невчк шүрүнәр закад, әәҗәхинь медҗәсинь, ээмднь һаран күргҗ, урмд өгч Бадм үүлдв. Цергч болһнь энүнә оньгт бәәв. Тиигәд нәәмн цергчтәһән Дорҗин Бадм 10 хонгин туршарт хортна дәврлтиг хәрү цокч, зөргтәһәр дәәлдв. Эврәннь харсчасн бәәрән батар бәрсн деерән хортна һарт орсн талдан нег бәәриг сулдхад, Дорҗин Бадмин отряд дөрвн хортыг бәрәнд авв. Мана артиллеристнрин халдана хөөн эдн ухан-сегәһән геесн бәәдлтә, гиҗ Бадм тер дәәлдәг тодлна.
Тер зөргтә үүлдврин хөөн Дорҗин Бадмиг цергә үүләрнь өөдлүләд, ротын командирт батлсмн. Хальмг цергчин зөргтә үүлдвр йосн кевәр ачлгдх гисн ицлтәһәр эн мөрмүд бичгдҗәнә. Дорҗин Бадм – «Лотос» цергә хаалһчн күцәмҗтә болтха!
ҖИРҺЛИН Кермн