Эмчнр бичкдүдт белгән өгв

Әрәсән Орн-нутгин Хүүвин депутат, «Негдсн Әрәсә» партин «Эрүл-менд иргч» гидг төсвин региональн зүүцүләч Башанкан Бадм җил болһн болдг «Залу-зөрмгин яршг» керг-үүлдврт орлцад, таңһчин эмнлһст удан цагтан эмнүлгдәҗәдг бичкдүдт наадһас өгүлв.

Шидр «Эрүл-менд иргч» гидг төсвин олна хүүвин гешүд «Сулда» төвин һардачин үүл дааҗадг Кусьминә Светлана, садв гемәс хөрлһнә таңһчин диспансерин әңгин һардач Пранцуза Валерия, хотл балһсна поликлиникин ах эмч Нәәмнә Бембә, Э.Тимошкаеван нертә гүлгн гемәс хөрлһнә таңһчин диспансерин ах эмч Муутла Земфира, ЭГС –ин депутат Босхмҗин Мира, Т.Хахлынован нертә эмнлһнәколледжин һардач Манҗин Кермн бас эн кергт орлцад, бичкдүдт белгән нерәдв. Эмчнрин келсәр, зәрм эк-эцкнр үртәһән эмнлһнд бәәдг арһ уга болна, тегәд бичкдүдт килмҗ болн дөң кергтә болна. Наадһас, дегтрмүд, билг-эрдм делгрүлдг эв-арһс бичкдүдт эмәс даву туслҗ, байр үүдәҗ омг өгнә, гиҗ буйнч седклин кергт орлцсн эмчнр темдглв.
Тер мет Башанкан Бадм О.Шунгаеван нертә нилхд төрлһнә төвд 52 миңһн һар кегдл белглв. Бадм Николаевич нилхд төрлһнә төвлә бат залһлда бәрҗ, эмнлһнә бүрдәцд дөңгән күргнә. Депутатын келсәр, бичкдүдин эрүл-мендин бәәдлнь эк-эцкин төлә хамгин үнтә болна.
- Кемр бичкн күнд гемтә болхла, терүнд дару-дарунь эмнлһ авх кергтә болна, зәрмнь нам насни дигт күртлән эмнлһнд бәәнә.Тегәд иим керг-үүлдврмүд бичкдүдт урмд өгнә, байрта йовдлмуд болхла, күүнә эрүл-менд батрулна, дарунь эдгхд туслна, - гиҗ Башанкан Бадм келв.

БАТАН Наталья
ЗУРГТ: эмнлһсин элчнр бичкдүдт наадһас авч ирв