Көдәрҗәдг һазрин төр хаһлв

Эн өдрмүдт Хальмг Таңһчин Толһач Хаска Бату Әрәсән Федерацин делегацин ханьд Саудовск Аравия орн-нутгт болсн ООН-а Конвенцин Халхсин Хургин 16-ч сессьт орлцв.
Нарт-делкәд бәәдг һазрин 40 процентнь көдәрәд, чинрән гееҗәхнь нәрн төр болҗана. Хур-чиг эс орҗахнь әәмшг учраҗана. Тиигәд номтнрин тоолврар, теңгрин бәәдл сольгдсна, һазрин көрңгиг тус угаһар олзлҗахас иштә 2000 җиләс авн хур эс орҗадг йовдл 29 процентд икдв.
Хальмг Таңһчин Толһачин келсәр, мана орн-нутгт хур-чиг баһар ордг һазрт усн эс күртҗәхнь, һазрин чинр муурчахнь, олз-ору авхин төлә тәрә тәрлһнә диг-дараг эвдлҗәдг йовдл нәрн төр болҗана. Цуг эн бәәдл мана таңһчд бас учрна, сүл арвн җилин эргцд һазр чиг авлго, өвсн урһдган уурв, энд бәәдг аң-аһрусна болн шовудын то баһрв.
- Һазр көдәрлһн – энтн мана таңһчин делгрлтин төлә эрк биш хаһлх төрмүдин негнь болна. Әрәсән Президент Владимир Путинлә болсн харһлтд һазриг көдәрлһнәс харслһна орн-нутгин шин көтлврин тускар келҗ өгсн биләв. Терүг белдлһнд мана таңһч бас орлцсн билә. Президент эн төр эркн чинртә болҗахиг темдгләд, нег регион эврән эн төриг хаһлҗ чадшго гив. Эн төр аһу ик чинртә, тегәд һазр көдәрлһнә төр үүмүлҗәдг талдан орн-нутгудын ухан-тоолвриг медҗ авх кергтә, - гиҗ Бату Сергеевич келв.
Әрәсән Федерац һазриг көдәрлһнәс харслһна туст байн дамшлт хоршав, тегәд тер кесгтнь туста болхмн. Советин йосна цагт һазриг көдәрлһнәс харслһна шишлң зура батлгдсн билә. Тернь Хальмгт сән йовудтаһар күцәгдсмн. Таңһчин Толһачин келсәр, мадна төлә һазр көдәрлһн чинртә төр болҗахас иштә нүүрлгч эв-арһс олзллһна дамшлтын регион болхдан белн бәәнәвидн.
-Президентин нөкд, теңгрин бәәдлин төрмүдәр үүлддг орн-нутгин толһачин шишлң элч Руслан Сайд-Хусайнович Эдельгериевд болн Әрәсән йиртмҗин көрңгин министерствд мана делегацин көдлмшиг бүрдәснд ханлтан өргҗәнәв. Мана хамцу дигтә-дарата көдлмш күцәмҗтә болхд иткчәнәв, - гиҗ Хаска Бату темдглв.
БАТАН Наталья