Цергчнрт белгән өгүлв

Городовиковск балһсна хазгудын кадетин бурдәцин сурһульчнр болн теднә эк-эцкнр, багшнр цергә керг-үүлдврт орлцҗадг Хальмг Таңһчин салдсмудт буйнч седклин дөңгән күргнә.

Эндр кесг райодын болн сурһульмудын бүрдәцс цергә шишлң керг-үүлдврт орлцҗадг дәәчнрт нөкд болна, теднд хот-хол, бичгүдән, гөлм болн нань чигн тоот илгәнә. Тер җисән цаг ирвәс делгрлт авад йовна. Тер тоод Городовиковск балһсна Ока Городовиковин нертә хазгудын кадетин бүрдәцин сурһульчнр тиим керг-үүлдврт өргнәр орлцна. Яһад гихлә эднәс ик зунь өсхләрн Төрскән харсдг цергә эрдм шүүҗ авна.
Одахн чигн эдн һардачин селвгч Валерия Рыбаковскаян седвәрәр дарани дөң цуглулад, Хальмг Таңһчин дәәчнрт терүг йовулад, буйнч седклтә керг күцәв.
Дәәчнрт эдн бичгән бичәд, тедниг дөңнәд, бүлән үгәрн урмд өгәд, теднә седклинь батрулна. Кадетмүд сән таалд сурна, теднә герлтә җирһлиг, Әрәсән сулдан болн үлмә уга бәәлһиг мана таңһчин болн цуг орн-нутгин дәәчнр, теднә эцкнр, ахнр харсчахинь, тер чинртә кергт тедниг эрк биш дөңнх кергтәһинь медҗәнә.
«Бидн хамгин түрүнд мана сурһульчнрин эк-эцкнрт болн кадетин бүрдәцин көдләчнрт болн багшнрт ик ханлтан өргҗәнәвидн. Эдн шунмһаһар эн кергт орлцсн деерән седвәртә һәрүүлдәд, ик тәвцән орулв.
Мана цуглулсн дөң цергчнрт хамгин үнтә белг болх гиҗ нәәлҗәнәвидн, төрскн һазраснь, элгн-саднаснь өөрхн әмтнәснь зәңг күргҗ улм урмдтаһар кергән күцәхднь туслх гиҗ санҗанавидн. Шин җилин байрин өмн өргнд бас нег дөң-белгән илгәхвидн»,- гиҗ Валерия Вячеславовна келв.
Цергә керг-үүлдврт эднә бүрдәцин көдләчнр эврә дурар орлцҗана. Урднь энд көдлҗәсн сурһмҗлачнр Иван Левченко болн Александр Арваджинов залу-зөргтәһәр дәәлдәнд орлцад, әмнәсн хаһцла. Ода бас Городовиковск районас арвад күн Төрскән харсчана.
Кадетин бүрдәцд сурдг нег көвүнә эцкнь класст ирәд, цергә үүлдврин тускар тодрхаһар келҗ өгәд, сурһульчнрин кесг сурврт хәрү өглә. Тиим улсин зөргтә үүлдвр арвтнрт үлгүр болҗана. Иим туста харһлтыг, СВО-н туск нань чигн керг-үүлдвриг классин һардачнр Наталья Минькина, Людмила Филиппова, Лилия Бортницкая, Байрта Ходжгорова эдн бүрдәнә, кадетмүд СВО-н дәәчнрәс үлгүр авна.
Цуглулсн демән кадетмүд болн теднә эк-эцкнр, элгн-садн, сурһмҗлачнр Городовиковск балһсна «Ниицлт» гидг нертә волонтермудын багин хайгар илгәнә өгнә. Сарпулин крайин хам-хоша бәәдг селәдин әмтн цуглулсн хот-хоолан болн нань чигн демән бас нааран авч ирнә. Цуг тер үгинь цуглулад, волонтермуд дәәлдәнә һазрт одад, белгинь бәрүлҗ өгнә.
Түүнә хөөн эдн дәәчнрәс ханлтын бичгүд авна, эннь урмдта болна. Цаг ирвәс эднә залһлдан батрадг, өргҗәд йовна, тиим нөкцлт цугтаднь туста болна. Кадетмүд церглҗәдг дәәчнриг йөрәҗ, теднд диилвр дурдна.

ТҮРВӘН Һуна