Хар Һазра района толһачин үүл дааҗана

Шидр Хар Һазра района депутатнрин Хургин дарани биш 32-ч сүүр болв. Терүнд цаг-болзгнь төгсснә учрар Виталий Крылов Хар Һазра района муниципальн бүрдәцин толһачин үүләсн сулдхгдв. Депутатнр Хальмгин Баатр Болдра Валерийиг района толһачин үүлд цаг зуур батлх шиидвр авв. Урднь, бар сарин 2-т, Болдра Валерий Хальмг Таңһчин Улсин Хуралын депутатын үүлән уурулҗахин туст эрлһән орулсмн.
Болдра Валерий мана таңһчин нүүрлгч «Первомайский» тохма мал асрдг селәнә эдл-ахуг олн җилдән толһалҗ йовсмн. Үнн-чик седклтәһәр көдләд, эдл-ахун олз-ору икдүллһнд ик тәвцән орулсн төләдән Болдра Валерий Хальмгин Баатрин болн Хальмг Таңһчин селәнә эдл-ахун ачта көдләчин нер зүүв. Валерий Астаевич таңһчин Улсин Хуралд ут тоодан хөрн һар җилдән үүлдәд, тавн хуралтын депутатд суңһгдсмн. Эн җилмүдин эргцд эн таңһчин әмтнә җирһлин таал ясруллһнд, чинртә төрмүд хаһллһнд туслсн закадын седвәр татсмн.
Болдра Валерий бар сарин 5-ас авн эн үүлд орх санаһан медүлсн улс дунд болх марһана аш диглтл Хар Һазра района толһачин үүл даахмн.

ДООҖАН Наталья